Qaraǵandy oblysynda múgedek pen onyń 6 synyp oqıtyn ulyn óltirgen degen kúdikpen eki bozbala ustaldy
ASTANA. 8 mamyr. QazAqparat - Qaraǵandy oblysynyń krımınaldyq polıtsııa qyzmetkerleri sáýir aıynyń aıaǵynda 3 toptaǵy múgedek bolyp tabylatyn 56 jastaǵy er adamdy jáne onyń 6 synypta oqıtyn 13 jasar ulyn óltirip, órtep jibergen Shet aýdanynyń eki turǵynyn qolǵa túsirdi. Bul týraly búgin QR ІІM baspasóz qyzmetiniń málimetterinde habarlandy.
«Soqqy izderi túsken jábirlenýshilerdiń janyp ketken máıitteri óz úıinen órtti sóndirgennen keıin baryp tabyldy. Polıtseıler quryqtaǵan 17 men 18 jastaǵy Shet aýdany Aqadyr kentiniń turǵyndary 30 sáýir kúni 56 jastaǵy er adammen qosylyp spırttik ishimdik ishken. Otyrys barysynda oılamaǵan jerden janjal shyǵyp, álgi ekeý jábirlenýshini uryp-soǵyp, sodan soń onyń ulyn óltirip, qylmystyń izin jasyrý úshin úıge órt qoıǵan»,-delingen taratylǵan málimette.
Ustalǵandardyń ekeýi de esh jerde oqymaıdy jáne jumys istemeıdi. Qylmystyq is qozǵalyp, kúdiktiler qamaýǵa alyndy.
