Qaraǵandy oblysynda múgedek balalarǵa, ardagerlerge kómek, qonys aýdarý máselesi qalaı sheshilýde
Qaraǵandy oblysynda múmkindigi shekteýli 67 319 adam turady, onyń ishinde 18 jasqa deıingi balalar – 5 367. Jumyspen qamtýdy úılestirý jáne áleýmettik baǵdarlamalar basqarmasynyń basshysy Ásem Júnispekova balalar qandaı áleýmettik qoldaý alatynyn, ońaltý quraldarymen jáne qyzmettermen qanshalyqty qamtamasyz etilgenin aıtyp berdi.
- Ásem Aıtjanqyzy, bıyl Balqashta balalarǵa arnalǵan ońaltý ortalyǵy ashylady. Sol týraly aıtyp berseńiz.
- Bul tirek-qımyl apparaty buzylǵan balalarǵa arnalǵan 50 oryndyq ońaltý ortalyǵy bolady. Qazir aýdany 1 200 sharshy metr eki qabatty ǵımaratta jóndeý jumystary júrip jatyr. Onda patsıentter alty aıǵa deıin ońaltýdan óte alady. Ortalyq jazda ashylady.
Áleýmettik qorǵaý jelisi boıynsha bul oblystaǵy balalarǵa arnalǵan alǵashqy memlekettik mekeme. Bizde memlekettik áleýmettik tapsyrys boıynsha qyzmet kórsetetin osyndaı jeke ortalyqtar bar.
Sondaı-aq, ótken jyly Maıqudyqtaǵy Qaraǵandy oblysynyń balalarǵa arnalǵan arnaýly áleýmettik qyzmet kórsetý ortalyǵy janyndaǵy basseınniń qurylysy boıynsha ınvestıtsııalyq jobany usyndyq. Bul qoldanystaǵy ǵımaratqa qosymsha bolady. Qazir jobalyq-smetalyq qujattama daıyndalýda.
- Bizdiń oblysta múgedektigi bar adamdarǵa memleket tarapynan qandaı qoldaý kórsetiledi?
- Jeke ońaltý baǵdarlamasy boıynsha biz jyl saıyn múmkindigi shekteýli adamdardy ońaltý quraldarymen jáne qyzmetterimen qamtamasyz etemiz. Ótken jyly olarǵa barlyǵy 32 646 quraldar, atap aıtqanda, protezdik-ortopedııalyq, sýrdo - jáne tıflotehnıkalyq quraldar berildi. Sondaı-aq, kreslo-arbalarmen jáne shıpajaı-kýrorttyq emdeýmen qamtamasyz etemiz. Sonymen qatar, bul tizimge mindetti gıgıenalyq quraldar, jeke kómekshi, ymdaý tili mamandary jáne ınvataksı kiredi.
Ótken jyly 547 qymbat noýtbýk pen 125 oqý mashınasyna qarajat bólindi. Sóıleý sıntezi bar noýtbýkter bar. Buryn biz múgedektigi bar adamdardyń osy tehnıkaǵa degen qajettiligin qanaǵattandyra almadyq.
Sondaı-aq, shıpajaılyq-kýrorttyq emdelýge 5 140 adam jiberildi. Osy jerde aıta ketkim keledi, oblys ákimi Jeńis Qasymbektiń tapsyrmasy boıynsha ótken jyldan bastap biz birinshi toptaǵy múgedektigi bar adamdar men múmkindigi shekteýli balalardy shıpajaılarǵa deıin alyp júrýshilerge jolaqy tóleımiz.
- Bıyl Ekinshi dúnıejúzilik soǵys ardagerleri men múgedekteri jáne olarǵa teńestirilgen oblys turǵyndary úshin qandaı áleýmettik qoldaý sharalary qarastyrylǵan?
- Osy jyldyń 1 qańtaryndaǵy málimetterge sáıkes, óńirde Ekinshi dúnıejúzilik soǵysynyń 34 qatysýshysy men múgedegi, sondaı-aq jeńildikter men kepildikter boıynsha olarǵa teńestirilgen 8 877 adam turady. Jeńis kúnine oraı qatysýshylar men múgedekterge árqaısysyna mıllıon teńgeden tólenetin bolady. Olarǵa teńestirilgenderge – 100 myń teńgeden beriledi. Tyl eńbekkerlerine – 30 myń teńgeden. Aýǵan soǵysyna jáne Chernobyl oqıǵalaryna tıisti kúnderi qatysýshylarǵa – 150 myń teńgeden tólenedi.
- Qonys aýdarýdyń kelesideı – óńiraralyq eńbek utqyrlyǵy (Ońtústik – Soltústik) sekildi memlekettik baǵdarlamasy bar. Ol kimge baǵyttalǵan jáne qonys aýdarǵysy keletinder úshin qandaı jaǵdaılar jasalady?
- Qonys aýdarý baǵdarlamasy «Qýatty óńirler-el damýynyń draıveri» ulttyq jobasy boıynsha 2025 jylǵa deıin iske asyrylýda. Jezqazǵan, Ulytaý jáne Nura aýdandarynyń jumys berýshileri elimizdiń ońtústik óńirleriniń turǵyndaryn jumysqa ornalastyrýǵa nıet bildirdi. Jaqyn arada biz elimizdiń ońtústigindegi bos oryndar jármeńkesine qatysyp, qonys aýdarý úshin úmitkerlerdi irikteıtin bolamyz. Bıyl barlyǵy 153 adamdy jumysqa qabyldaý josparlanýda.
Qonys aýdarýshylarǵa otaǵasyna jáne onyń árbir múshesine bir ýaqytta 200 myń teńgeden (70 AEK) sál artyq aqsha tólenedi. Sondaı-aq, bir jyl ishinde turǵyn úıdi jalǵa alý jáne kommýnaldyq qyzmetterdi tóleý shyǵyndary óteletin bolady. Qajet bolǵan jaǵdaıda qonys aýdarýshylar oqýǵa, jumysqa ornalasýǵa járdemdesýge jáne kásipkerlik bastamashylyqqa joldama alady. Sonymen qatar, jumys berýshiler 450 AEK kóleminde sýbsıdııa alady.
Jumyspen qamtý jáne áleýmettik baǵdarlamalardy úılestirý basqarmasynyń aldynda kóptegen mindetter tur. Osylaısha, bıyl 41 myń adamdy jumysqa ornalastyrýǵa járdemdesý sharalarymen qamtý, 7,4 myń turaqty jumys ornyn qurý josparlanýda.
