Qaraǵandy oblysynda «Mereıli otbasy» baıqaýynda kenshiler áýleti jeńiske jetti
Bıyl baıqaýdyń aýdandyq/qalalyq jáne oblystyq kezeńderine qatysý úshin 200-den astam otbasy ótinim berdi. Onyń ishinde 36 otbasy óńirlik týrǵa ótti. Baıqaý onlaın formatta ótkizildi.
«Komıssııanyń sheshimimen baıqaýdyń óńirlik kezeńinde birinshi oryn Shahtınsk qalasynan Kosolapovtar otbasyna berildi. Bul tórtinshi býyndaǵy kenshiler áýleti, óńirdiń kómir shahtalarynda jalpy jumys ótili 400 jylǵa jýyq. Dástúrli qundylyqtary bar otbasy. Ekinshi oryndy Shet aýdanynan Ydyrysovtar ıelendi. Úshinshi oryndy Saran qalasynyń Qýat otbasy ıelendi», – dedi Qaraǵandy oblysynyń ishki saıasat basqarmasynyń basshysy Erlan Qusaıyn.
Kosolapovtar otbasynda shahtada otaǵasymen qatar jubaıy da jumys isteıdi.
Olar «Mereıli otbasy» baıqaýyna birinshi jyl qatysyp otyrǵan joq. 2017 jyly baıqaýdyń qalalyq týrynda birinshi oryndy ıelendi.
Otaǵasy Valerıı Kosolapov Lenın atyndaǵy shahtada tik uńǵylardyń úńgileýshisi, al Lıýdmıla - aǵa tabelshi bolyp jumys isteıdi.
Olar 18 jyl buryn úılengen jáne eki ul tárbıelep otyr.
«Bizdiń otbasymyz – tórt urpaqqa deıingi kenshiler. Qazirgi ýaqytta «ArselorMıttal Temirtaý» Kómir departamentiniń kásiporyndarynda bizdiń otbasymyzdyń 12 múshesi eńbek etedi. Eger shyǵý tegimizden ketetin bolsaq, bizdiń jerasty kenshileriniń birlesken ótili 365 jyldan astam ýaqytty quraıdy. Shahtalarda kúıeýim, ákem, aǵalarym, tátelerim jumys isteıdi, jaqynda anam zeınetke shyqty. Barlyǵy 12 adam. Kúıeýim ekeýmiz shahtaǵa 2006-2007 jyldary keldik. Osy ýaqyt ishinde ekeýimiz de óz jumysymyzdy jaqsy kórip kettik. Kúıeýim 2019 jyly «Jyl shahteri» nomınatsııasynda jeńiske jetkeni úshin «Jyl adamy» syılyǵyna ıe boldy», – dedi Lıýdmıla.
Kosolapovtardyń otbasynda tatýlyqtyń jáne nekede baqytty bolýdyń qupııasy – ózara kómek jáne ózara túsinistik ekenin atap ótti. Erli-zaıyptylar úılenip, balaly bolǵannan beri «men» sózin umytyp, ony «biz» degenge almastyrǵan.
«Bizdiń otbasymyz úlken, tatý jáne ınternatsıonaldyq. Biz Qazaqstannyń barlyq merekelerin, sondaı-aq pravoslavıelik jáne musylmandyq merekelerdi atap ótemiz. Biz dástúrli beshbarmaq daıyndaımyz, slavıan taǵamdaryn da jaqsy kóremiz. Munyń bári bizdi birtutas etedi. Týystarmen birge úlken jıyn ótkizgendi jaqsy kóremiz, birge saıahattaımyz. Bizdiń otbasymyzda erler men áıelderdiń mindetteri dep bóliný joq. Biz bárin birge jasaımyz jáne árqashan bir-birimizge kómektesýge tyrysamyz. Árıne, bizdiń árqaısymyzdyń óz múddelerimiz, súıikti is-áreketterimiz, óz kózqarasymyz bar. Biz bir-birimizdi qurmetteımiz. Múmkin, uzaq jáne baqytty qarym-qatynastyń qupııasy osynda bolar», - deıdi Lıýdmıla.
Óńirlik kezeńniń jeńimpazdary «Mereıli otbasy» ulttyq baıqaýynyń respýblıkalyq kezeńinde Qaraǵandy oblysynyń namysyn qorǵaıdy.
Baıqaý uıymdastyrýshylarynyń aqparaty boıynsha, bıyl barlyq fınalıster avtomatty túrde konkýrs laýreaty ataǵyna ıe bolady.
Esterińizge sala keteıik, «Mereıli otbasy» ulttyq baıqaýy adamgershilik qundylyqtardy jańǵyrtýǵa jáne otbasy men nekeniń oń beınesin nasıhattaýǵa, sondaı-aq otbasy mártebesin arttyrýǵa baǵyttalǵan. Ol Elbasynyń bastamasymen 2014 jyldan beri ótkizilip keledi.
