Qaraǵandy oblysynda mereke qarsańynda páter kilti tabystaldy
Páterler mádenıet jáne óner uıymdarynda turǵyn úı kezeginde turǵandar tizimi boıynsha bólindi.
«Sizderdiń arańyzda eńbek ótili bar mádenıet qaıratkerleri de, jas mamandar da bar ekeni qýantady. Biz osy keremet dástúrdi jalǵastyra beremiz. Jaqyn arada 100 páterli taǵy eki úı tapsyrylady», – dep quttyqtady oblys ákimi Jeńis Qasymbek.
S. Seıfýllın atyndaǵy akademııalyq qazaq drama teatrynyń trýppa meńgerýshisi Janar Rahmanovanyń balalary áli kúnge deıin óz baqytyna sene almaýda.
Endi olardyń árqaısysynyń óz bólmesi bolady.
«Men 45 jastamyn, jalǵyz ózim kámeletke tolmaǵan eki balany – qyz ben ul tárbıelep otyrmyn. Osy ýaqyt ishinde biz jaldamaly páterlerde turdyq. Bizdiń qazir óz baspanamyz bar ekenine áli senbeı otyrmyz. Páter úsh bólmeli, úlken, barlyǵyna oryn jetkilikti. Meniń otbasym óte qýanyshty», – deıdi Janar Rahmanova.
Qaraǵandy oblysyndaǵy mádenıet jáne óner qyzmetkerleriniń turǵyn úı máseleleri Jeńis Qasymbektiń tapsyrmasy boıynsha sheshile bastady.
Alǵash ret 30 páter 2021 jyly Saran men Aqtas kentinde berildi. Sondaı-aq, óńirde dárigerler men muǵalimder baspanamen qamtamasyz etilýde.
Kenshiler, metallýrgter jáne jumys isteıtin jastar úshin turǵyn úı máselesi jeńildetilgen ıpoteka arqyly sheshilýde.
Basqa da memlekettik baǵdarlamalar jumys isteıdi. Sonyń biri – «Nurly jer».
Bul baǵdarlama boıynsha respýblıka kúnine oraı Temirtaýdan 90 kezekte turǵandar páter aldy.
Jyl sońyna deıin Qaraǵandy oblysynda túrli baǵdarlamalar esebinen bar-joǵy 2 myńǵa jýyq otbasy baspanamen qamtylady.
Sondaı-aq, ulttyq mereke qarsańynda Temirtaýda jańa emhana ashyldy.
Medıtsınalyq mekeme MJÁ aıasynda ekinshi shaǵyn aýdanda salyndy.
Eki qabatty ǵımarat turǵyn úı massıviniń ortasynda ornalasqan jáne zamanaýı jabdyqtarmen qamtamasyz etilgen.
Munda 20 myń adam tirkele alady.
Temirtaýda sportpen shuǵyldanatyn jańa oryn – «Odısseı» mádenı-saýyqtyrý kesheni paıda boldy.
Jańa nysanda trenajer zaldary, fıtnes alańdar jabdyqtalǵan. Kásibı jattyqtyrýshylar jumys isteıdi.
