Qaraǵandy oblysynda menıngıtke baılanysty jaǵdaı turaqty
QARAǴANDY. QazAqparat - Qaraǵandy oblystyq densaýlyq saqtaý basqarmasy óńirdegi menıngokokk ınfektsııasyna qatysty jaǵdaı týraly aıtty, dep habarlaıdy QazAqparat tilshisi.
«Qazir oblysta jaǵdaı turaqty. Qazaqstannyń birqatar oblysynda menıngokokk ınfektsııasyna baılanysty epıdemııalyq jaǵdaı qıyndaı túskendikten, aldyn alý sharalaryn kúsheıtip, aýrýdyń Qaraǵandy oblysyna taralýyna jol bermeý sharalaryn qarastyrdyq. Emhanalardy jeti kúndik jumys rejımine ótkizdik», - deıdi densaýlyq saqtaý basqarmasynyń basshysy Erjan Nurlybaev.
Sońǵy bes jylda Qaraǵandy oblysynda menıngıtke baılanysty 66 naýqas tirkelgen, sonyń tek 16-sy ǵana menıngokokk ınfektsııasynan aýyrǵan. Bıylǵy bes aıda 4 jaǵdaı tirkeldi, sonyń biri menıngokoktyq etıologııa boldy. Naýqas sáýirde aýrýhanaǵa túsken, mamyrdyń basynda aýrýhanadan shyǵaryldy.
Budan tys, Qoǵamdyq densaýlyqty saqtaý departamenti adamdar kóp jınalatyn jerlerge ilý úshin býkletter ázirlep jatyr.
«Balalarǵa náreste kezinde vaktsına egý kóptegen aýrýlardyń aldyn alady. Ata-analardan mindetti egýden bas tartpaýyn surar edik», - deıdi Erjan Nurlybaev.
Vedomstvo ókilderi jeke gıgıenany mindetti túrde saqtaý qajettigin aıtady. Qoldy jıi jýýǵa, úıdiń ishin jıi jeldetip otyrýǵa, ashyq sý basseınderinde shomylýdan saqtanýǵa keńes beredi. Alǵashqy sımptomdary belgi bergen bette dárigerge júginý qajet.
«Biz kún saıyn monıtorıng júrgizip otyrmyz. Búgingi tańda bizdiń oblysta menıngokokk ınfektsııasy juqty dep kúdiktengender joq. Sondaı-aq alty emhanada aqyly vaktsına egiledi. Qaraǵandy oblysynda menıngokoktyq ınfektsııanyń vaktsınasynyń quny - 21500 teńge», - deıdi E. Nurlybaev.
Aıta keteıik, Qaraǵandy oblysynda 1 maýsymnan bastap menıngıtke qarsy aqyly vaktsına egilip jatyr.
