Qaraǵandy oblysynda memorgandardyń 11 basshysynyń ústinen qylmystyq is qozǵaldy
QARAǴANDY. QazAqparat - Qaraǵandy oblysynda bıyl jyl basynan beri memlekettik organdardyń 11 basshysy sybaılas jemqorlyq áreketke barǵany úshin jaýapqa tartyldy, dep habarlaıdy QazAqparat tilshisi.
Sybaılas jemqorlyqqa qarsy qyzmet bıýdjetten memlekettik baǵdarlamalardy júzege asyrý úshin bólingen qarajattardy turaqty túrde qadaǵalap otyrady. 2018 jyldyń basynan beri sybaılas jemqorlyqqa qatysty 33 tulǵa qylmystyq jaýapqa tartyldy, sonyń 11-i túrli deńgeıdegi memlekettik organdardyń basshylary.
«9 sáýirde Qarqaraly aýdandyq soty Qarqaraly aýdanynyń turǵyn úı-kommýnaldyq sharýashylyq, jolaýshylar kóligi jáne avtomobıl joldary, qurylys, turǵyn úı ınspektsııasy bóliminiń basshysyn 6 jylǵa bas bostandyǵynan aıyrdy. Ol 2016 jyly «Nurly jer» baǵdarlamasy boıynsha Qarqaralynyń ınjenerlik-kommýnıkatsııalyq ınfraqurylymyn damytýǵa bólingen 52 mln teńge mólsherindegi bıýdjet qarajattaryn jymqyrýǵa qatysqan», - deıdi Sybaılas jemqorlyqqa qarsy is-qımyl ulttyq bıýrosynyń Qaraǵandy oblysy boıynsha departamenti basshysynyń orynbasary Erqanat Esenov.
Bıyl qańtar aıynan naýryzǵa deıin 66 qylmystyq quqyqbuzýshylyq tirkelip, sonyń 47-si sybaılas jemqorlyqqa qatysty qylmystar bolǵan. Qazirgi kezde 40 qylmystyq is sotqa berildi.
Al memlekettik baǵdarlamalardy oryndaý aıasynda 11 fakt, atap aıtqanda «Nurly jer» baǵdarlamasy boıynsha - 3, 2016-2019 jyldarǵa arnalǵan «Densaýlyq» baǵdarlamasy boıynsha - 1, 2016-2019 jyldarǵa arnalǵan ǵylym-bilimdi damytý baǵdarlamasy boıynsha - 2, al tilderdi damytý baǵdarlamasy boıynsha - 5 quqyqbuzýshylyq anyqtalǵan.
Oblystyq departament ókilderiniń aıtýynsha, sonyń saldarynan memleketke jalpy 87,5 mln teńge zııan keltirilip, sonyń 78,3 mln teńgesi qaıtarylǵan.
