Qaraǵandy oblysynda memlekettik rámizder kúni qalaı atap ótildi
QARAǴANDY. QazAqparat – Memlekettik rámizder kúnin Qaraǵandy oblysynyń turǵyndary aýqymdy atap ótti. Mereke qurmetine óńirde avto-jáne velojarystar men aktsııalar uıymdastyryldy.
Dástúrli túrde oblystyń qalalary men aýdandarynda memlekettik rámizder kúnin merekeleý Ánurandy bir mezgilde oryndaýdan bastaldy. Saǵat 11:00-de barlyq memlekettik mekemelerde, bilim berý jáne mádenıet uıymdarynda qyzmetkerler elimizdiń Ánuranyn oryndady.
Qaraǵandyda Jastar resýrstyq ortalyǵynyń bastamasymen qala kóshelerinde jalaýshalar, magnıtter men tátti ónimder taratý boıynsha «Men Patrıotpyn» aktsııasy ótkizildi. Qala turǵyndaryna sonymen qatar «Qazaqstan» shokolady taratyldy. Aktsııaǵa qalalyq shtabtyń eriktileri, jastar máslıhatynyń depýtattary jáne t. b. qatysty.
Qaraǵandylyqtar memlekettik rámizder jaıly qanshalyqty jaqsy biletinin anyqtaý maqsatynda vıktorınalar da uıymdastyryldy.
«Qazaqstan rámizderi — elimizdiń árbir azamaty úshin erekshe qundylyq. Qazaqstandyqtar óz eliniń memlekettik belgilerine erekshe qaraıdy, sebebi olar elimizdiń ózindik birligi men beıbitshiliginiń, ar-namysynyń, maqtanyshy men táýelsizdiginiń kórinisine aınaldy. Qurmetti jerlester! Qaraǵandy qalasy jastarynyń atynan osy mereke kúni sizderge amandyq, baqyt, beıbitshilik tileımiz! Bizdiń Otanymyz — Qazaqstan Respýblıkasy gúldene bersin!» — dep Qaraǵandy Jastar resýrstyq ortalyǵynyń basshysy Symbat Áýbákirova qala turǵyndaryn merekemen quttyqtady.
Shahtınsk qalasynda jáne oǵan irgeles kentterde merekege oraı «Meniń elimniń rámizderi» jáne #MenińTýym aktsııasy ótti. Turǵyndarǵa memlekettik rámizderdiń tarıhy, olardyń elimiz úshin, sondaı-aq árbir qazaqstandyq úshin mańyzy men róli týraly aıtyldy, sondaı-aq estelik syılyqtar tabys etildi.
Mádenıet qaıratkerleri de shette qalǵan joq. Barlyq mádenıet úılerinde onlaın-kontsertter, balalarǵa arnalǵan sýret baıqaýlary ótti. Shahannyń ortalyq alańynda «Týǵan jerim — maqtanyshym meniń!» radıo baǵdarlamasy jarııalandy.
Sátbaevta tańerteńnen bastap velojarys uıymdastyrylyp, qalada merekelik kóńil kúı ornady. Shahar turǵyndaryn sharaǵa qatysqan ákim Asqar Ydyrysov quttyqtady.
«Velojarys bizdiń birligimizdiń, patrıotızmniń, Otanǵa degen súıispenshiligimizdiń, salaýatty ómir saltymyzdyń belgisi retinde memlekettik rámizder kúnin qoldaý maqsatynda ótkiziledi jáne el Táýelsizdiginiń 30 jyldyǵyna arnalady», — dep atap ótti Asqar Ydyrysov.
El Táýelsizdiginiń mereıtoılyq jylynda velosherýge 30 áýesqoı velosıpedshi qatysqany erekshe mánge ıe. Árbir velosıpedtiń aldyńǵy qanatynda Qazaqstannyń kishkentaı týy jelbiredi.
Velo- jáne avtosherýler Abaı aýdanynda da ótti. Ár kólik pen velosıped Qazaqstan jalaýlarymen bezendirildi.
