Qaraǵandy oblysynda memlekettik qyzmetterdiń sapasy tekserildi
QARAǴANDY. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qaraǵandy oblysy boıynsha departamenti memlekettik qyzmet kórsetý sapasyn baǵalaý jáne baqylaý sharalaryn júrgizdi, dep habarlaıdy QazAqparat tilshisi.
Monıtorıng kezeńinde polıtsııa, Memlekettik kirister departamentteriniń, «Azamattarǵa arnalǵan úkimet» memkorporatsııa fılıalynyń, oblystyń qalalary men aýdandarynyń jergilikti atqarýshy organdarynyń, onyń ishinde jergilikti bıýdjetten qarjylandyrylatyn atqarýshy organdardyń memlekettik qyzmetterdi kórsetý sapasy men deńgeıi tekserildi. Jalpy oblys boıynsha Memlekettik qyzmet kórsetetin 230-ǵa jýyq memlekettik mekemeler men uıymdardyq qyzmeti baǵalandy.
«Qaraǵandy oblysynyń jergilikti atqarýshy organdary usynǵan memlekettik qyzmet kórsetý sapasyn ishki baqylaý boıynsha eseptik derekterdi qaıta tekserý barysynda 2018 jyly kóptegen kemshilikter anyqtaldy. Eseptik málimetterge sáıkes, Qaraǵandy oblysynyń jergilikti atqarýshy organdary barlyǵy 7 272 858 Memlekettik qyzmet kórsetti, alaıda qaıta tekserý barysynda naqty kórsetilgen qyzmetterdiń sany 7 273 418 qurady, ıaǵnı barlyǵy 560 naqty kórsetilgen memlekettik qyzmet esepke alynbaǵan», - dep habarlady Memlekettik qyzmet basqarmasynyń basshysy Erdos Ábdirahmanov.
Jalpy, bastapqy boljam boıynsha 2018 jyly memlekettik qyzmetter kórsetý sapasynyń tıimdiligin baǵalaý 52 baldy qurady, bul kórsetkish 2017 jylmen salystyrǵanda 11 balǵa joǵary.
Jyl saıyn baǵalaý is-sharalary sheńberinde qaıta tekserý kezinde eseptik derekterde anyqtalǵan burmalaýlardyń sany azaıyp, oń dınamıka baıqalady. Bul jalpy respýblıkalyq reıtıngte Qaraǵandy oblysynyń pozıtsııasyn jaqsartady.
