Qaraǵandy oblysynda mektepter beınebaqylaýmen qamtamasyz etiledi
QARAǴANDY. QazAqparat - Qaraǵandy oblysynda 1 qyrkúıekke qaraı 124 mektep kúrdeli jóndeýden ótedi. Árbir oqý orny beınebaqylaý júıesimen jabdyqtalady. Jańa oqý jylyna daıyndyq týraly Saryarqa telearnasynyń tikeleı efırinde bilim basqarmasynyń basshysy Esenǵazy Imanǵalıev aıtyp berdi, dep habarlaıdy QazAqparat tilshisi.
Aldaǵy oqý jylyndaǵy mektepterdiń jumysyna qatysta eń basty másele – qashyqtan oqytýǵa kóshý. Basqarma basshysynyń aıtýynsha, qyrkúıek aıynda oqýshylardyń qalaı oqıtyny aımaqtaǵy epıdemıologııalyq jaǵdaıǵa baılanysty bolady.
«Eger COVID-19 deńgeıi bizge dástúrli oqý túrine oralýǵa múmkindik bermegen jaǵdaıda, oqý úderisin ózgeshe uıymdastyrýdyń nusqalary daıyn. 507 mekteptiń 322-inde ınteraktıvti platformalarda qashyqtan oqytý josparlanǵan, 112 mektepte aralas formada jáne 73 mektepte sabaq shtattyq rejımde ótedi», - dedi ol.
Esenǵazy Imanǵalıev oqytý júıesine qatysty áleýmettik jelilerdegi habarlamalarǵa senbeýge jáne shynaıy derekkózderden alynǵan aqparatqa nazar aýdarýǵa shaqyrdy.
Bıylǵy jyly mektepke aldyn ala esepteý boıynsha 23 myńnan astam birinshi synyp oqýshysy barady. Ótinishter 1 tamyzǵa deıin onlaın-rejımde de, dástúrli túrde de qabyldanady. Pandemııa men emhanalardaǵy júktemeniń joǵary bolýyna baılanysty medıtsınalyq anyqtamalardy oqý jyly bastalǵanǵa deıin tapsyrýǵa bolady.
Az qamtylǵan jáne kóp balaly otbasylardan shyqqan oqýshylar ystyq tamaqpen, mektep jabdyqtarymen jáne formamen qamtamasyz etiledi. Sondaı-aq, olardyń mektepke deıingi jol júrý shyǵyndary óteledi.
Bilim berý bólimderiniń aldyn ala málimetteri boıynsha 4 787 oqýshyǵa osyndaı kómek kórsetiledi.
Qazir óńirdiń barlyq bilim berý mekemelerinde aldaǵy oqý jylyna belsendi daıyndyq júrip jatyr.
Jóndeý jumystary 433 nysanda júrgizilýde. 124 mektep kúrdeli jóndeýden ótedi. Aǵymdaǵy jóndeý 309-da júrgizilýde. Oqý jylynyń basynda aýyldyq mektepterde buryn kóshelerde ornalasqan 118 dárethana ǵımarat ishine aýystyrylady.
1 qyrkúıekke qaraı oblystyń barlyq orta oqý oryndarynda beıne baqylaý júıesi ornatylady.
Bıylǵy jyly muǵalimder men oqýshylarǵa 1 495 statsıonarlyq kompıýter, 250 noýtbýk jáne 1 119 planshet satyp alyndy. Oqý jyly bastalǵanǵa deıin taǵy 1 655 kompıýterlik tehnıka satyp alý josparlanýda.
