Qaraǵandy oblysynda mektep medıtsınasyna 1,6 mlrd teńgeden astam qarajat bólinedi
Oqý jáne tárbıe mekemelerine bekitilgen emhanalar balalardyń densaýlyǵyn saqtaý jáne nyǵaıtý, olardyń arasynda syrqattanýshylyqty azaıtý jónindegi is-sharalardy josparlaıdy jáne júrgizedi, profılaktıkalyq egýler men tekserýler kestesin jasaıdy, ýaqtyly dıspanserleýge baqylaý júrgizedi.
Mysaly, Prıshahtınskidegi emhananyń birine 8 mektep tirkelgen. Olardyń árqaısysynda medpýnkt jabdyqtalǵan jáne medbıke jumys isteıdi, ol jyl boıy profılaktıkalyq egýlerdi, qaýip tobyndaǵy balalarǵa týberkýlın dıagnostıkasyn josparlaıdy jáne júrgizedi, mektep oqýshylaryna tereńdetilgen medıtsınalyq tekserýdi uıymdastyrady. Sondaı-aq, medbıkeniń mindetine pedagogtar ujymyna, mektep qyzmetkerlerine jáne ashana qyzmetkerlerine jumysqa ruqsat alý úshin sanıtarlyq kitapshalardy baqylaý kiredi.
«Mektepterdegi barlyq medıtsına qyzmetkerleri maman sertıfıkatyna ıe, «Bilim berý obektileriniń meıirbıkesiniń shuǵyl kómek kýrsymen jumysy» mamandyǵy boıynsha biliktilikti arttyrý kýrstarynda oqýdan ótti, sondaı-aq jyl saıyn profılaktıkalyq egýlerdi júrgizýge jáne mantý reaktsııasynyń synamasyn qoıýǵa ruqsat berýmen attestattaý ótkiziledi», – deıdi emhana basshysy Indıra Madııarova.
Oqý jylynyń basynan bastap emhana mamandary bir jarym myńǵa jýyq mektep oqýshysyn tekserdi, 88 bala nevropatologtyń tolyq tekserýine jiberildi, 242 bala endokrınologtyń usynymy boıynsha tekserýden ótýi tıis.