Qaraǵandy oblysynda mektep medıtsınasyna 1,6 mlrd teńge qarajat bólinedi

QARAǴANDY. QazAqparat – Bıyl Qaraǵandy oblysynyń emhanalaryna mektepter men balabaqshalarda medıtsınalyq kómek uıymdastyrýǵa 1 mlrd 601 mln teńge bólý josparlanǵan, dep habarlaıdy QazAqparat tilshisi.

Oqý jáne tárbıe mekemelerine bekitilgen emhanalar balalardyń densaýlyǵyn saqtaý jáne nyǵaıtý, olardyń arasynda syrqatty azaıtý sharalaryn josparlaıdy jáne júrgizedi, profılaktıkalyq ekpe men tekserýler kestesin jasaıdy, ýaqtyly dıspanserleýge baqylaý júrgizedi.

Mysaly, Prıshahtınskidegi emhananyń birine 8 mektep tirkelgen.

Olardyń árqaısysynda medpýnkt jabdyqtalǵan jáne medbıke jumys isteıdi.

Ol jyl boıy profılaktıkalyq ekpe, qaýip tobyndaǵy balalarǵa týberkýlın dıagnostıkasyn josparlap júrgizedi, mektep oqýshylaryna tereńdetilgen medıtsınalyq tekserýdi uıymdastyrady.

Sondaı-aq, medbıkeniń mindetine pedujymǵa, mektep qyzmetkerlerine jáne as blogynyń qyzmetkerlerine jumysqa ruqsat alý úshin sanıtarlyq kitapshalardy baqylaý kiredi.

«Mektepterdegi búkil medıtsına qyzmetkerleri maman sertıfıkatyna ıe, «bilim obektileri meıirbıkesiniń shuǵyl kómek kýrsymen jumys» mamandyǵy boıynsha biliktilikti arttyrý kýrsynda oqýdan ótti, sondaı-aq jyl saıyn attestattaý ótkiziledi», – deıdi emhana basshysy Indıra Madııarova.

Oqý jylynyń basynan bastap emhana mamandary bir jarym myńǵa jýyq mektep oqýshylaryn tekserdi, 88 bala nevropatologtyń tolyq tekserýine jiberildi.

242 bala endokrınologtyń usynymy boıynsha tekserýden ótýi tıis.