Qaraǵandy oblysynda «megabaýyrsaq» pisirildi
QARAǴANDY. QazAqparat - Qaraǵandy oblysy boıynsha QAJD AK-159/20 mekemesiniń qyzmetkerleri men sottalǵandar eń úlken baýyrsaq ázirledi.
«Naýryz» merekesi qarsańynda sottalǵandar AK-159/20 (qaýipsizdigi barynsha tómen) mekemesiniń ákimshiligine eń úlken baýyrsaq daıyndaý usynysymen júgindi. Basshylyq pen jeke quram sottalǵandardyń ıdeıasyn qoldap, daıyndaý úshin barlyq qajetti ıngredıentterdi usyndy, dep habarlaıdy QazAqparat tilshisi.
«Megabaýyrsaqqa» qamyr ıleýge 8 kılogramm un, 80 gramm ashytqy, 10 lıtr kúnbaǵys maıy, tuz jáne sý jumsaldy» dep habarlady AK-159/20 mekemesinde jazasyn óteýshi Áıgerim Aıtqulova.
Qazaqtyń dástúrli baýyrsaq taǵamy qazanda maıda pisiriledi. Mundaı úlken taǵamdy daıyndaý kóp qıyndyq týdyrdy. Ystyq maıǵa salynǵan qamyr tek syrtynan qýyrylyp, ishinen shıki bolyp qaldy. Tórt sátsiz synaqtan keıin kishkene aılaǵa barýǵa týra keldi. Sál juqalap ılengen qamyr metall konteınerge tartylyp, ústinen ystyq maı quıyldy. Alynǵan jartylaı sfera tárizdes pisken nan shıki qamyrmen bekitilip, qaıtadan qýyryldy. Dástúrli taǵam retinde ázirlengen «megabaýyrsaq» barlyq jaǵynan qýyrylǵan jáne ishi bos bolyp shyqty. Onyń dıametri 120 santımetr, salmaǵy úsh kılogramnan sál asady.
«Ulttyq taǵam daıyndaý sottalǵandarǵa úı atmosferasyn sezinýge jáne kóktemgi «Naýryz» merekesiniń jaqyndaýyna múmkindik berdi», - dedi tárbıe bóliminiń bastyǵy ádilet maıory Altyngúl Mızambekqyzy.
Daıyndalǵan «megabaýyrsaq» jeýge jaramdy bolyp shyqty, is-shara sońynda kez kelgen adam onyń bir bóligin bólip jep, dám tata aldy.
