Qaraǵandy oblysynda medıtsınalyq kýálandyrýdyń jańa júıesi engiziledi
QARAǴANDY. QazAqparat - Qaraǵandyda medıtsınalyq kýálandyrýdan ótý úshin hromatografııalyq zerthanalardyń biryńǵaı jelisin qurý josparlanýda, dep habarlaıdy QazAqparat tilshisi.
Derekter naqty ýaqyt rejıminde polıtsııa departamentiniń, oblystyq prokýratýranyń jáne narkologııalyq dıspanserdiń aqparattyq júıesine beriledi.
«Hromatografııalyq zerthanalar jelisi oblystyq medıtsına mekemeleriniń bazasynda ornalasady. Olar esirtki zatnyń 100 túrine arnalǵan muraǵaty bar jańa analızatorlarmen jabdyqtalady. Bul apparattar saraptama nátıjesin polıtsııa departamentiniń, oblystyq prokýratýra men narkologııalyq dıspanserdiń bazasyna naqty ýaqyt rejıminde bere alady, ol óz kezeginde saraptamanyń shynaıylyǵyna kúmándanbaýǵa múmkindik beredi», - dep túsindirdi Qaraǵandy oblysy densaýlyq saqtaý basqarmasynyń basshysy Erjan Nurlybaev quqyq buzýdyń aldyn alý jónindegi vedomstvoaralyq komıssııanyń otyrysynda.
Medıtsınalyq kýálandyrýdyń jańa júıesin qurý – quqyq buzýdyń aldyn alý jónindegi sharalar kesheniniń qadamdarynyń biri. Osy baǵytta atqarylyp jatqan jumystar týraly oblystyq ákimdikte málimdedi. Mysaly, esepte turǵan otbasylardy baqylaýdy kúsheıtý kózdelip otyr. Bul rette buryn sottalǵan azamattar men úısizderdiń áleýmettik problemalaryn sheshýge erekshe nazar aýdarý qajet.
«Biz Qaraǵandy men seriktes qalalarda qosymsha beıimdeý ortalyqtaryn ashýdy usynamyz. Qazir bul mekemelerde adamdar alty aı boıy mekendeýge quqyly. Sodan keıin olar dalada qalady, bul olardy qylmystarǵa ıtermeleıdi. Biz olardyń turaqty turatyn jeri jáne jumysqa ornalasqanǵa deıin sol jerde bolý ýaqytyn ulǵaıtýdy jón dep sanaımyz», - dedi Qaraǵandy oblysy polıtsııa departamenti bastyǵynyń birinshi orynbasary Qurmanǵalı Ysmaǵulov.
Ol sondaı-aq qamaý oryndarynan bosaǵandar úshin qosymsha qysqamerzimdi qaıta oqytý kýrstaryn ashýdy jáne olardy jumysqa ornalastyrý úshin kvota sanyn arttyrýdy usyndy.
Osy is-árekettiń barlyǵy 2020-2022 jyldarǵa arnalǵan quqyq buzýdyń aldyn alý jónindegi josparǵa engizilgen. Oǵan kóshedegi jáne otbasylyq-turmystyq qarym-qatynas salasyndaǵy quqyq buzý faktileri, mas kúıinde jasalǵan qylmystar, JKO jáne basqalardyń sanyn azaıtý boıynsha mindetter kiredi.
Oblysta kóshede jáne qoǵamdyq orynda jasalatyn qylmystar sany qysqardy. Sondaı-aq aýyr qylmys azaıdy. Alaıda maskúnemdik pen araqqumarlyq jalpy krımınogendik jaǵdaıǵa áser etýde.
