Qaraǵandy oblysynda medıtsına qyzmetkerlerine 168 páter berilmek
QARAǴANDY. QazAqparat - Aldaǵy jyldary Qaraǵandy oblysynda medıtsına qyzmetkerleriniń tapshylyǵy joıylady. Bul týraly apparattyq jıynda Densaýlyq saqtaý basqarmasynyń jetekshisi Erjan Nurlybaev málim etti, dep habarlaıdy oblys ákiminiń resmı saıty.
Aımaqta bul másele medıtsına qyzmetkerlerine turǵyn úı berý boıynsha sheshilýde. Bul tájirıbe óz tıimdiligin kórsetti.
Vedomstva málimetinshe, búginde óńirde memlekettik densaýlyq saqtaý júıesinde 15 myńǵy jýyq adam qyzmet etýde: 4620 dáriger jáne 10 myńnan astam orta medıtsına qyzmetkerleri. 2017 jyly 273 dáriger jumysqa ornalastyryldy, olardyń 23-i aýyldyq jerlerde. Búgingi tańda dárigerler tapshylyǵy 107 adamdy quraıdy. Sonymen qatar, oblystyk medıtsınalyq mekemelerinde 250-den astam zeınetker jumystaryn jalǵastyrýda.
2018 jyly 200 jas maman keledi dep kútilýde, onyń ishinde 30-y aýyldyq jerlerde. Jáne tapshylyq bar baǵyttar boıynsha mamandardy ınternatýra men rezıdentýrada oqytý kózdelýde.
Birinshi bolyp medıtsına qyzmetkerlerine qyzmettik páterler Balqash pen Shahtınskide berile bastady. Oblys ákimi Erlan Qoshanov bul tájirıbeni dárigerler tapshylyǵy bar basqa qalalarda júrgizýdi tapsyrdy.
- Biz qyzmettik turǵyn úı usyný arqyly mamandardy tartý jáne bekitýdiń 2018-2020 jyldarǵa arnalǵan jobasy ázirlendi. Aýdan ákimdikterimen birlese turǵyn úı salýǵa keletin ǵımarattardy izdeý boıynsha aýqymdy jumystar atqaryldy,-deıdi Erjan Nurlybaev.
Medıtsına qyzmetkerlerine Abaı, Shahtınsk jáne Saran qalalarynda turǵyn úıler daıarlanýda. Qaraǵandyda 100-den astam páter qurý máselesi qarastyrylýda.
- 2018-2020 jyldar aralyǵynda biz mamandarǵa 168 páter usyna alamyz,-dedi vedomstva basshysy. - Mamandardy tartý jáne bekitý boıynsha keshendi sharalardy júrgizý arqyly biz aldaǵy eki jylda aımaqta dárigerler tapshylyǵyn joıamyz».
Ol sonymen qatar Balqashta 300 oryndyq medıtsına kolledjiniń jataqhanasyn qalpyna keltirý jumystary bastalǵanyn aıtty.
Oblys ákimi qol astyndaǵylarǵa medıtsına qyzmetkerlerin tezirek turǵyn úımen qamtý boıynsha qajetti sharalardy qabyldaýdy tapsyrdy.
- Biz zamanaýı jabdyqtarǵa qyrýar qarjy jumsaımyz, jańa dárigerlik ambýlatorııalardy quramyz. Alaıda jumys isteıtin adam bolmasa, munyń bárinen esh paıda joq,- dep atap ótti Erlan Qoshanov.
