Qaraǵandy oblysynda medıtsına qyzmetkerine jalaqy aýdarý kezindegi qatelik túzetildi
QARAǴANDY. QazAqparat - Densaýlyq saqtaý basqarmasynyń qyzmetkerleri óńirdegi medıtsınalyq mekemeleriniń birinde qyzmet etetin medbıkege jalaqysyn aýdarý kezinde paıda bolǵan tehnıkalyq qatelikti sheshýge kómektesti, dep habarlaıdy QazAqparat tilshisi Qaraǵandy oblystyq Densaýlyq saqtaý basqarmasynyń baspasóz qyzmetine silteme jasaı otyryp.
Jýyrda zarplata@zdravkrg.kz elektrondy poshtasyna oblystaǵy bir emhananyń qyzmetkerinen shaǵym túsken. Medbıke óz jalaqysynyń túbirtegin jiberip, onda ýáde etilgen 30% qosymsha aqynyń joqtyǵyna shaǵymdanǵan. Tekseris barysynda jeke málimetterdi engizý kezinde kompıýterlik aqaý bolǵany anyqtaldy. Qatelik túzetilip, medıtsına qyzmetkerine tolyq kólemde jalaqy tólendi.
«Ókinishke oraı keıde osyndaı jaǵdaılar bolady, sondyqtan eger medıtsına qyzmetkerlerinde jalaqyny aýdarýǵa qatysty máseleler týyndap jatsa, olar bizdiń poshtamyzǵa jaza alady, óz kezegimizde biz máseleni sheshýge kómektesemiz», - deıdi Densaýlyq saqtaý basqarmasy jetekshisiniń orynbasary Ásel Tuıaqova.
Elektrondy poshta iske qosylǵannan beri oǵan 16 hat kelip túsken. Kelip túsken hattardyń kóbi Qaraǵandy oblysyndaǵy medıtsınalyq mekemelerge qatysty bolmaǵandyqtan jalaqyny durys aýdarmaý týraly shaǵymdar basqa óńirlerge joldandy.
Eske sala keteıik, zarplata@zdravkrg.kz elektrondy poshtasy shilde aıynyń basynda iske qosyldy. Munda kez kelgen medıtsına qyzmetkeri jazyp, óziniń jalaqysyna qatysty túsiniktemelerdi ala alady.
Qaraǵandy oblysynda 18 000 asa medıtsınalyq qyzmetker (dárigerler, medbıkeler men sanıtarlar) ústemeli jalaqy aldy, dálirek aıtar bolsaq qyzmettik tólem emes, naqty jalaqy ósti.
Bıýdjettik salanyń tómengi jalaqy alatyn qyzmetkerleriniń eńbekaqysyn ósirýdi «Nur Otan» partııasynyń sezinde Elbasy Nursultan Nazarbaev tapsyrǵan bolatyn. Keıinirek Prezıdent Qasym-Jomart Toqaevtyń tapsyrmasymen atalmysh tapsyrmany oryndaý merzimi 2019-shy jyldyń 1 maýsymyna aýystyrylǵan edi.
