Qaraǵandy oblysynda metsenat aýyl aýrýhanasyna jol talǵamaıtyn kólik syılady
Endi dárigerler jyldyń kez kelgen mezgilinde shalǵaıdaǵy aýyldarda turatyn naýqastarǵa der kezinde, esh kedergisiz kómek kórsete alady, dep habarlaıdy QazAqparat tilshisi.
Aǵadyr kenti aýrýhanasynyń qurylymdyq bóliminiń basshysy Esenjol Jazybaev alty jyl boıy medıtsınalyq mekemege kólik qajet ekenin alǵa tartqan. Endi aýyl dárigerleri patsıentterdi emdeý nemese tasymaldaý úshin shalǵaı jerlerge esh kedergisiz bara alady. Ózekti máseleni sheshýge osy aýylda týyp-ósken metsenat Áset Dándibaev kómektesti.
«Qyzyltaý aýylynyń týmasy, Áset Dandybaev azamatqa emhana ujymdary atynan, jalpy halyq atynan alǵysym sheksiz. Otbasyna amandyq tileımin. Eńbegi jemisti bolyp, halqyna qyzmet jasaı berýine tilektespin», - dedi Aǵadyr kenti aýrýhanasynyń qurylymdyq bólimshesiniń basshysy Esenjol Jazybaev.
Jańa kóliktiń arqasynda jergilikti dárigerler Ortaý, Qyzyltaý, Óspen, Qaıraqty, Jumysker, Kıikti jáne Moıynty aýyldarynyń turǵyndaryna sapaly medıtsınalyq qyzmet kórsete alady.
Kásipker jerlesterine kómektesýdi óziniń mindeti dep sanaıdy.
«Dúnıejúzin jaýlaǵan koronavırýs indeti búkil álemge zardabyn tıgizip jatyr. Qazaq halqyna da bul aýrý ózindik kesirin tıgizdi. Osy ýaqyt aralyǵynda ár azamat jaýapkershilikpen qarap, jumyla kótergen júk jeńil degendeı qolynan kelgen kómekti jasaý kerek dep esepteımin. Bul ár azamattyń boryshy dep oılaımyn», - deıdi «ARCI METTAL» JShS Bas dırektory Áset Dándibaev.
Shet aýdanynda qaıyrymdylyq sharalary jalǵasýda. Aqadyr kentiniń turǵyndary qoǵamdyq qor arqyly jınalǵan qarajatqa patsıentterge 3 ottegi apparatyn satyp alyp, jetkizdi. Sonymen qatar, Ortaý jáne Óspen aýyldarynyń turǵyndary medıtsınalyq mekemelerge et pen qymyz taratty.