Qaraǵandy oblysynda mas erkek jedel járdem brıgadasyna shabýyl jasady
ShAHTINSK. QazAqparat – Mas er adam áıeliniń qulaǵyna shanyshqy shanshyǵanyn aıtyp, jedel járdem brıgadasyn shaqyrtqan. Alaıda zardap shekken áıeldi qaraýǵa feldsherdi jibermeıtinin málimdep, esigin jaýyp alǵan. Biraz ýaqyttan soń buzaqy dárigerlerdiń ózine shabýyl jasap, kólikti zaqymdaǵan, dep habarlaıdy QazAqparat tilshisi.
Oqıǵa 27 qyrkúıekte Qaraǵandy oblysynyń Shahtınsk qalasynda oryn aldy. Jedel medıtsınalyq kómek qyzmetiniń dıspetcherlik pýltine bir er adamnan áıeliniń qulaǵyna shanyshqy qadap jibergeni týraly qońyraý kelip tústi. «Jedel járdem» brıgadasy shaqyrtý ornyna shyǵyp, osy jaǵdaı týraly polıtsııaǵa habarlaǵan.
«Áıel zardap shekti degen shaqyrtý kelip tústi. Alaıda, bizdiń brıgada qajetti qabatqa kóterilgen kezde er adam esikti ashpady. Ol jabyq esik arqyly dárigerlerdi polıtsııasyz kirgizbeıtinin aıtyp, aıqaılaı bastady. Bizdiń qyzmetkerler syrtqa shyǵyp, kólikke otyrǵan. Bes mınýttan soń er adam shyǵyp, daýys kóterdi», - deıdi Shahtınsk aımaǵy boıynsha shuǵyl kómek kórsetý qosalqy stantsııasynyń meńgerýshisi Irına Bagına.
Buzaqy kirpish alyp, jedel járdem kóligine qaraı laqtyra bastaǵan. Osylaısha mas adam kapot pen áınekti zaqymdady.
«Baqytymyzǵa oraı, feldsherler zardap shekken joq. Bul jedel járdem brıgadasyna shabýyl jasaǵan alǵashqy jaǵdaı emes. Dárigerlerimiz osyndaı jaǵdaıda ne isteý kerektigin biledi. Júrgizýshi birden kólikti otaldyrdy. Alaıda, er adam jol bermeı, dóńgelektiń astyna túsýge umtyldy. Kelesi kúni feldsherlerdi polıtsııa ýchaskesine shaqyrtyp, bizdiń mamandar shaǵym jazdy», - dedi Irına Bagına.
Aıta ketý kerek, bul azamattyń mas kúıinde áıeline qol kóterýi birinshi ret emes.
«Eki derek te polıtsııada tirkelgen. Ýchaskelik polıtsııa qyzmetkeri oqıǵa ornynan 36 jastaǵy er adamǵa qatysty materıal jınap, ony alkogolızmnen májbúrlep emdeýge jiberdi. Búgingi tańda ol Saran qalasynyń MEPM-de jatyr», - dep túsindirdi Qaraǵandy oblysy PD baspasóz qyzmeti.
Zardap shekken áıeldi jedel járdem brıgadasy qarap shyǵyp, jaraqat tańý beketine jetkizdi. Ol dárigerlerdiń qorytyndysy boıynsha úıine ambýlatorlyq emdelýge jiberildi.
