Qaraǵandy oblysynda mal arsynda taraǵan aýrýǵa tekserý júrgizilýde
QARAǴANDY. QazAqparat - Qaraǵandy oblysynyń Nura aýdanyna qarasty K.Myńbaev aýylynda mal aýrýy tarady. Boljam boıynsha ol pasterellez, dep habarlaıdy QazAqparat.
Pasterellez ázirge aldyn ala jasalǵan boljam. Vırýs týraly naqtyraq málimetter aýrý maldyń qanyna júrgizilgen saraptaý jumystarynan soń belgili bolady.
«Qaraǵandylyq veterınarlyq zerthanada aýrý maldardyń qany tekserilýde. Onyń nátıjeleri jaqyn kúnderi belgili bolady. Aýrý - múıizdi iri qaradan tabylyp otyr. Osy ýaqytta 22 maldyń aýrý juqtyrǵany málim. Al usaq mal men jylqyda, shoshqada aýrýdyń belgileri tabylǵan joq»,-dedi Qaraǵandy oblysy ákimdiginiń ókilderi.
Osy ýaqytta veterınarııa qyzmetiniń mamandary aýlalardy aralap, mal turǵan oryndardyń barlyǵyna sanıtarlyq tazalyq jumystaryn júrgizdi. Aýrý juqtyrǵan mal oqshaýlandyryldy jáne olardy emdeý jumystary qolǵa alyndy.
«Jaǵdaı Nura aýdanynyń da Qaraǵandy oblystyq ákimdiginiń de baqylaýynda tur», dedi oblys ákimdigindegiler.
