Qaraǵandy oblysynda qysqy maýsym bastalǵaly 2 balyqshy qaza tapty
QARAǴANDY. QazAqparat - Kún saıyn Qaraǵandy oblysynyń sý aıdyndarynda TJ departamentiniń qyzmetkerleri aldyn alý is-sharalaryn júrgizedi, dep habarlaıdy QazAqparat tilshisi.
Qutqarýshylar muz astynan balyq aýlaý áýesqoılaryna qysqy sý aıdyndarynyń qaýiptiligin túsindiredi, balyqshylarǵa jadynamalar taratyp, olardy sýdaǵy oryn alǵan qaıǵyly oqıǵalar týraly habardar etedi.
Atalmysh túsindirý jumystary ásirese demalys kúnderi kúsheıtiledi, sebebi osy kúnderi balyqshylar jappaı muzǵa shyǵady.
Júrgizilip jatqan aldyn alý jumystaryna qatysty turǵyndar men balyqshylardyń ózderi de oń pikirlerin bildirip, alǵystaryn aıtýda.
«TJ qyzmetkerlerine úlken rahmet, olar sý aıdynyndaǵy qaýipsizdik sharalary týraly jadynamalar taratty. Maǵan da tótenshe jaǵdaılarda qalaı áreket etý kerektigin aıtyp berdi. Fedorov sý qoımasynda baqylaý jumystary úshin úlken rahmet aıtqym keledi. Men onda qysta jáne jazda jıi balyq aýlaımyn. Jazda qaıyqpen júzip, balyq aýlaýǵa shyqqanda qutqarýshylar árdaıym keledi, keýdesheniń bar-joǵyn tekseredi, kóńil-kúıdiń qalaı ekenin suraıdy jáne kúnge qyzyp ketpeýdi eskertedi. Qysqy merzimde qaýipsizdik týraly jadnamalar taratylady. Eń bastysy, men jeke ózim sý qoımasyna batyp ketken adamǵa alǵashqy kómek kórsetkeniniń kýási boldym. Jigitter - óz isiniń kásipqoılary. Biz týraly alańdaýshylyq bildirgenderińizge úlken rahmet», - dep jazǵan balyqshylardyń biri Instagram-daǵy TJD-nyń paraqshasynda.
Aǵymdaǵy qysqy maýsymnyń basynan beri Qaraǵandy oblysynda 6 adam qutqaryldy, 2 adam qaza tapty, taǵy 2 balyqshy áli tabylǵan joq. Oqıǵanyń negizgi sebepteri - muzda qaýipsizdik sharalaryn saqtamaý.
«Túngi ýaqytta balyq aýlaýǵa jol berilmeıdi. Daýyldy aýa raıynda jáne jeke qutqarý quraldarynsyz sýǵa shyǵýǵa tyıym salynady. Balyq aýlaý kezinde shaǵyn ǵana aýmaqta kóp shuńqyr oıyp, top adam jınalýǵa bolmaıdy. Balyq aýlaýshyǵa aýa raıy, jeldiń kúshi men baǵytyn bilý qajet. Sondaı-aq, árbir balyqshynyń qutqarý quraldary bolýy tıis» dep eskertedi qutqarýshylar.
