Qaraǵandy oblysynda qylmystyq toptan tapanshalar men patrondar tabyldy
QARAǴANDY. QazAqparat – Qaraǵandy oblysynda jalǵan shot-faktýralar berýmen aınalysyp kelgen qylmystyq toptan qarý-jaraq pen oq-dáriler tabyldy, dep habarlaıdy QazAqparat.
QR Qarjy mınıstrligi Qarjy monıtorıngi komıtetiniń Qaraǵandy oblysy boıynsha Ekonomıkalyq tergeý departamentiniń qyzmetkerleri qylmystyq topty áshkereledi. Olar jalǵan shot-faktýralar berýmen aınalysqan. Tergeý barysynda qylmystyq toptan zańsyz satyp alynǵan jáne saqtalyp kelgen qarý-jaraq pen oq-dáriler tabyldy. Naqty aıtqanda, 4 tapansha men 133 patron tárkilendi.
«Atalǵan fakti boıynsha QR QK-niń 287-babynyń 2-bóligine sáıkes (qarýdy, oq-dárilerdi zańsyz ıemdený, berý, ótkizý, saqtaý, tasymaldaý nemese alyp júrý) sotqa deıingi tergeý bastaldy», - dedi Qarjy monıtorıngi komıtetinen.
