Qaraǵandy oblysynda KVI-men syrqattanýshylyq birshama tómendedi

QARAǴANDY. QazAqparat – Qaraǵandy oblysynda KVI-men syrqattanýshylyqtyń kún saıynǵy ósýi tejelip, tómendeı bastady. Búgingi kúni óńirdiń ınfektsııalyq statsıonarlarynda 1 705 adam emdelýde. Jansaqtaý bólimshelerinde 78 patsıent bar, olardyń 10-y ÓJJ apparattaryna qosylǵan, dep habarlaıdy QazAqparat tilshisi.

Qaraǵandy oblysyndaǵy epıdemıologııalyq ahýal jaıly Óńirlik kommýnıkatsııalar qyzmeti alańynda ótken onlaın-brıfıngte Densaýlyq saqtaý basqarmasynyń basshysy Gamal Toqsambaev aýrýshańdyqtyń ósýi azaıyp jatqandyǵyn málim etti.

«Kún saıyn 300-den astam jaǵdaıdy tirkeımiz. Osynyń negizinde tósek qýattylyǵyna júkteme tómendedi jáne qazir 25 paıyzdy quraıdy. Ótken eki aptamen salystyrǵanda biz tósek-oryn qoryn 1 433 orynǵa qysqarttyq. Búgingi tańda oblystyń barlyq juqpaly aýrýlar gospıtaldarynyń tósek syıymdylyǵy 4 246 quraıdy», – dep atap ótti Gamal Toqsambaev.

Onyń aıtýynsha, barlyq ınfektsııalyq statsıonarlar qajetti jabdyqtarmen qamtamasyz etilgen, ÓJJ-apparattary men ottegi kontsentrattary jetkilikti. Ortalyqtandyrylǵan ottegimen 26 medıtsınalyq uıym jabdyqtalǵan.

«Oblysta qosymsha 25 kompıýterlik tomografııa kabıneti ashyldy. 10 PTR-zerthana táýligine 15 myńnan astam PTR-zertteýler júrgize alady», – dep atap ótti spıker.

Óńirde ekpe naýqany jalǵasýda. Búgingi kúni oblysta turǵyndardyń 57%-y (435 538 adam) tolyq egildi. Birinshi komponentti 506 454 adam aldy.

«Vaktsınatsııa ázirge pandemııamen kúresýdiń jalǵyz ádisi bolyp tabylady. Sondyqtan halyqtyń qajetti ımmýndyq qabatyn neǵurlym tez uıymdastyrsaq, pandemııany soǵurlym tezirek jeńemiz. Taǵy da barlyq turǵyndardy vaktsınatsııadan ótýge jáne sanıtarlyq normalardy saqtaýǵa shaqyramyn», – dedi Gamal Toqsambaev qaraǵandylyqtarǵa.