Qaraǵandy oblysynda kúzgi-qysqy ań aýlaý maýsymy bastaldy
1 qarashadan bastap Qaraǵandy oblysynda terisi baǵaly ańdardy aýlaý maýsymy ashyldy. Ol 15 aqpanǵa deıin jalǵasady.
«Qazirgi ýaqytta Qaraǵandy oblysynyń aýmaǵynda 139 ańshylyq sharýashylyǵy bar, onyń ishinde 106-sy ańshylyq paıdalanýshylarǵa bekitilgen, al 33-i ýákiletti organmen ózgeshe belgilenbese, aýmaǵynda ań aýlaýǵa tyıym salynǵan rezervtik qorda. Janýarlardyń jasy men túrlerine sáıkes ań aýlaýdy júzege asyrýdy, sırek kezdesetin jáne joıylyp bara jatqan janýarlar túrleriniń tirshilik etý ortasyn saqtaý jáne jaqsartý maqsatynda janýarlar dúnıesine uqypty qaraýdy suraımyz», – dep atap ótti Qaraǵandy oblysynyń Tabıǵı resýrstar jáne tabıǵat paıdalanýdy retteý basqarmasy.
Ań aýlaýdy unatatyndardyń tıisti qujattary bolýy qajet: janýarlar dúnıesin paıdalanýǵa ruqsat, ańshy kýáligi, ańshylyq sharýashylyǵy sýbektisiniń joldamalary. Oq qarýymen ań aýlaý kezinde – azamattyq qarý men onyń patrondaryn saqtaýǵa jáne alyp júrýge ruqsat qaǵazy.
Ań aýlaý, sondaı-aq janýarlardyń sırek kezdesetin túrlerin joıý erejeleri saqtalmaǵan jaǵdaıda zań buzýshylar brakonerlik úshin jaýapqa tartylatyn bolady.
