Qaraǵandy oblysynda qutqarýshylar joǵalǵan úsh adamdy taýyp, 15 adamdy evakýatsııalady
QARAǴANDY. QazAqparat – Joǵalǵandardy izdeý jáne qutqarý jumystary Ulytaý jáne Osakarov aýdandarynda júrgizildi. Qutqarýshylar joǵalyp ketken úsh er adamdy taýyp, kóligimen jolda turyp qalǵan 15 adamdy evakýatsııalady, dep habarlaıdy QazAqparat tilshisi.
5 naýryz kúni tańǵy saǵat 9:40-tan bastap Ulytaý aýdanynda 3 adamdy izdeý jumystary júrgizildi. Bul jumystarǵa TJD, jergilikti atqarýshy organdar, polıtsııa jáne jergilikti halyq jumyldy.
«Joǵalǵandar Sarlyq aýylynan soltústikke qaraı 30 shaqyrym jerden tabylyp, Qostanaı oblysynyń Baısaqal qystaǵyna jetkizildi. Kólik qar qursaýynda qalyp, ózdiginen shyǵa almaǵany belgili boldy. Qutqarylǵandar medıtsınalyq kómekke muqtaj emes edi», - dep habarlady Qaraǵandy oblysy TJD baspasóz qyzmeti.
Sol kúni saǵat 23:25-te Osakarov aýdanynda «Qyzylorda-Pavlodar» avtojolynyń 1076 shaqyrymynda, Molodejnyı kentinen 10 shaqyrym jerde TJD kúshimen qar qursaýynda qalǵan 5 jeńil avtokólikten 15 adam, onyń ishinde 2 bala evakýatsııalandy. Adamdar Molodejnyı kentine jetkizildi, olar medıtsınalyq kómekke muqtaj emes.
Sondaı - aq Osakarov aýdanynda «Almaty-Ekaterınbýrg» avtojolynyń 1137 shaqyrymynda, Osakarovka kentinen 6 shaqyrym jerde, 6 naýryz kúni saǵat 04:45-te TJD kúshimen joldyń tazartylǵan ýchaskesine qar qursaýynan jeńil avtokólik súıretilip shyǵaryldy, salonda 1 adam bolǵan.
