Qaraǵandy oblysynda qutqarýshylar men tehnıkanyń qysqa daıyndyǵy tekserildi
QARAǴANDY. QazAqparat – Qaraǵandyda «Qys-2021» Respýblıkalyq komandalyq-shtabtyq oqý-jattyǵý bastaldy, dep habarlaıdy QazAqparat tilshisi.
Qaraǵandy oblysynyń ákimi Jeńis Qasymbek pen TJD bastyǵy Murat Qatpanov Qaraǵandy oblysynyń Azamattyq qorǵaý apattyq-qutqarý quramalarynyń, jyljymaly basqarý pýnktiniń jáne shatyrly lagerdiń daıyndyǵyn tekserdi.
«Qys-2021» komandalyq-shtabtyq oqý-jattyǵýlary azamattyq qorǵaýdyń memlekettik júıesiniń basqarý organdary men kúshteriniń qys jaǵdaıynda tótenshe jaǵdaılardyń aldyn alý jáne olardy joıý jónindegi ázirligin tekserýge baǵyttalǵan. Olar eki kúnge sozylady. Taktıkalyq is-sharaǵa Qazaqstan TJM aýmaqtyq bólimsheleriniń jedel-qutqarý quramalary, apattyq-qutqarý qyzmetteriniń quramyna kiretin 52859 áskerı bólimi qatysady.
«Oqý-jattyǵý kezinde «Barshanyń nazaryna!» biryńǵaı komandasy boıynsha elektrodabyl qosý arqyly habarlandyrý júıesiniń tehnıkalyq daıyndyǵy tekserildi. Sondaı-aq dalalyq basqarý pýnktiniń jumysy kórsetildi, onda qajetti baılanys túrlerimen jabdyqtalǵan shtabtyq shatyr, medıtsınalyq qamtamasyz etý, tamaqtaný, jylytý jáne psıhologııalyq kómek pýnktteri ashyldy», - dep málimdedi Qaraǵandy oblysy TJD baspasóz qyzmeti.
Sonymen qatar, qutqarýshylar júrip ótý múmkindigi joǵary avtomashınalar bazasyndaǵy jyljymaly baılanys toraptarynyń múmkindikterin kórsetti. Sondaı-aq, apattyq-tehnıkalyq qurylymdardyń daıyndyq baıqaýlary jáne bıik ǵımarattardaǵy órtti sóndirý boıynsha taktıkalyq-arnaıy oqý-jattyǵý ótkizildi.
Sonymen qatar, óńirdiń qutqarý quramalary adasqan ańshylardy izdeý boıynsha praktıkalyq tapsyrmany pysyqtady. Jospar boıynsha úsh adamnan turatyn ańshylar toby Buqar Jyraý aýdanynyń Novostroıka aýylynan ań aýlaýǵa shyǵyp, qatty qar men burqasyn saldarynan baǵdaryn joǵaltty. Ańshylardyń biri pana taýyp, ornalasqan jeriniń koordınattaryn «112» kezekshisine habarlady. Qalǵan eki ańshy jaqyn mańdaǵy eldi mekenderdi óz betinshe tabýǵa tyrysyp, bólinip, joǵalyp ketti.
Úsh baǵyt boıynsha izdestirý jumystaryn júrgizý úshin kınologııalyq esepteýmen «Trekol», «Veıa» jáne «Ýjgýr» joǵary ótimdi tehnıkasy jumyldyryldy. Sondaı-aq izdeý aımaǵyna aýadan barlaý úshin TJM «Qazavıaqutqarý» AQ tikushaǵy jiberildi.
