Qaraǵandy oblysynda qutqarýshylar iz-túzsiz ketken balany tapty
QARAǴANDY. QazAqparat – Qaraǵandy oblysynyń Shubartúbek kentinde 12 jastaǵy bala habar-osharsyz ketken. Bir jarym kúnnen keıin ony eldi mekennen 800 metrdeı jerden Balqash qalasynyń tótenshe jaǵdaılar basqarmasynyń qyzmetkerleri taýyp aldy, dep habarlaıdy QazAqparat tilshisi.
26 tamyz kúni keshki 9-da Balqash qalasynyń tótenshe jaǵdaılar basqarmasyna kezekshi polıtsııa bóliminen Shubartúbek kentinde tańǵy 11 shamasynda 2007 týǵan balanyń joǵalǵany týraly habar kelip túsken.
Týystarynyń aıtýynsha, olar velosıped tartý etken. Bala ony minip alyp, basy aýǵan jaqqa júre bergen. Alǵashynda jergilikti polıtsııa qyzmeti men ýchaskelik ınspektorlar izdegenmen, odan nátıje shyqpaǵan.
Balqash qalasynyń tótenshe jaǵdaılar basqarmasynyń jedel toptary Shubartúbekke baryp, qarańǵy túsýine qaramastan balany izdeýdi jalǵastyrǵan.
Shamamen túngi úshte basqarma bastyǵy, azamattyq qorǵanys podpolkovnıgi B.B. Habdýlın kentten 700-800 metr aryda aryqqa velosıpedimen qulaǵan balany taýyp aldy. Qutqarýshylar ony ata-anasyna tapsyryp, jedel járdem shaqyrdy.
Avtor: Agata Muhamedjanova
