Qaraǵandy oblysynda kún saıyn koronavırýs belgisi bar 50 adam aýrýhanaǵa jatqyzylady
QARAǴANDY. QazAqparat - Qaraǵandy oblysy densaýlyq saqtaý basqarmasynyń basshysy Erjan Nurlybaev koronavırýs ınfektsııasynyń alǵashqy belgileri kezinde dereý kómekke júginýge shaqyrdy. Ol óz betinshe emdelý aýyr asqynýǵa ákelýi múmkin ekenin atap ótti, dep habarlaıdy QazAqparat tilshisi.
Erjan Nurlybaev epıdemıologııalyq jaǵdaı jáne medıtsınalyq mekemelerdiń jumysy týraly Zoom platformasyndaǵy onlaın-brıfıngte áńgimelep berdi.
Búgingi kúni Qaraǵandy oblysynda COVID-19 juqtyrǵan bes adam óz betinshe dem ala almaıdy jáne ókpeni jasandy jeldetý apparatyna qosylǵan. Onyń úsheýi medıtsınalyq kómekke tym kesh júgingen.
«Adamdar úıde emdelýge tyrysqan. Qazir bul patsıentter dárigerlerdiń táýlik boıy qadaǵalaýynda jansaqtaý bóliminde aýyr kúıde jatyr. Barlyq turǵyndardy medıkterdiń úndeýine qulaq asýǵa shaqyramyn. Bul - óte mańyzdy. Jedel járdem shaqyrýdan qoryqpaý kerek, kerisinshe dert saldarynan qorqý kerek», - dedi ol.
Basqarma basshysy oblysta KVI juqtyrǵan naýqastarǵa kómek kórsetý úshin resýrstar men jabdyqtar jetkilikti ekenin atap ótti. Karantın bastalǵanǵa deıin óńirde 28 ÓJJ apparaty bolǵan. Qosymsha 44 satyp alyndy, onyń 22-i jetkizildi.
«Biz KVI-men aýyratyn naýqastardy emdeý úshin tósek qoryn kóbeıtemiz. Búgin aýrýhanalardyń biriniń bazasynda qosymsha 100 ınfektsııalyq baǵyttaǵy tósek ashyldy. Kelesi aptanyń basynda taǵy kereýetter ornatylady, - dedi Erjan Nurlybaev. - Qaraǵandyda qazir 647 tósektiń 66-sy bos. Kúnine biz shamamen KVI belgileri bar 50 adamdy aýrýhanaǵa jatqyzamyz. Jaǵdaı baqylaýda. Biz aldyn alý sharalaryn qabyldaımyz. Bizdiń mindetimiz - barlyǵyn der kezinde medıtsınalyq kómekpen qamtamasyz etý».
Oblysta KVI anyqtaý boıynsha zerthanalar sany da artyp kele
Oblys statsıonarlary josparly emdeýge jatqyzýdy ishinara toqtatty. Infarkt, ınsýlt jáne jaraqattan keıin kómek kórsetý úshin ońaltý ortalyqtary jumysyn jalǵastyrýda. Emhanalarda ýaqytsha skrınıng jáne dıspanserleý júrgizilmeıdi.
Emhanaǵa barýdy azaıtý úshin qaýip tobyndaǵy patsıentterge dári-dármek úıge jetkiziledi.
Erjan Nurlybaev qaraǵandylyqtardy sanıtarlyq talaptardy saqtap, óz densaýlyǵy men jaqyndaryn saqtaýǵa shaqyrdy.
Qaraǵandy oblysy boıynsha búgingi kúni KVI aýrýynyń 1 624 jaǵdaıy tirkelgen. 716 adam saýyǵyp ketti. 9 naýqas qaıtys boldy.
