Qaraǵandy oblysynda kún saıyn 7-8 myń adam vaktsına saldyrady

QARAǴANDY. QazAqparat – Qaraǵandy oblysynda koronavırýs ınfektsııasyna qarsy vaktsına alǵandardyń sany ósip otyr. Búgingi tańda vaktsınanyń alǵashqy komponentin 314 023 adam aldy, ekinshisin – 170 958 adam saldyrdy, dep habarlaıdy QazAqparat tilshisi.

Apparattyq keńeste Memleket basshysynyń 10 shildedegi Úkimettiń keńeıtilgen otyrysynda aıtylǵan tapsyrmalarynyń oryndalýy talqylandy.

«Memleket basshysy koronavırýspen kúres sharalaryn qaıta qaraýǵa shaqyrdy. Ol pandemııamen kúres formaty ózgerip jatqanyn jáne kóptegen elder vırýstyń taralýyn nólge deıin tómendetýdi maqsat etpeıtinin atap ótti. Prezıdent aýyr jaǵdaılar men ólim-jitimdi azaıtýǵa, sondaı-aq kúrdeli naýqastardy emdeýge basa nazar aýdarýǵa shaqyrdy. Immýndaý aýrý aǵymynyń aýyrlyǵyn jáne ólim qaýpin barynsha tómendetedi», – dedi oblys ákimi Jeńis Qasymbek.

Densaýlyq saqtaý basqarmasynyń basshysy Gamal Toqsambaevtyń sózine súıensek, oblysta vaktsınatsııa jalǵasýda.

Onyń aıtýynsha, kún saıyn KVI-ge qarsy vaktsınatsııany shamamen 7000-8000 adam jasaıdy.

«Qaraǵandy oblysynda KVI juqtyrýdyń 43 291 jaǵdaıy tirkeldi. 38 229 adam saýyǵyp ketti. Sońǵy eki aptada barlyq qalalar men aýdandarda aýrý kórsetkishiniń óskeni baıqalady. Bul óńirimizdiń «qyzyl» aımaqqa ótýine ákeldi. Delta shtamynyń taralýy rastaldy. Oblystyń densaýlyq saqtaý júıesi epıdemıologııalyq jaǵdaıdyń nasharlaýyna daıyn – tıisti jumys jospary qabyldandy», – dep baıandady vedomstvo basshysy.

Densaýlyq saqtaý basqarmasynyń aqparatyna sensek, óńirde KVI bar naýqastardy emdeýge arnalǵan 6 myńnan astam tósek-oryn bar, onyń 1 275-i rezervte tur.

Balalarǵa 375 tósek-oryn uıymdastyryldy. Júkti jáne bosanǵan áıelderge arnalǵan aýrýhana bólek ashyldy.

Qazir juqpaly aýrýlar aýrýhanalarynda 2 364 medıtsına qyzmetkeri jumys isteıdi. Taǵy myńnan astamy rezervte.

Oblysta 5 shuǵyl áreket etý brıgadasy quryldy, oǵan ınfektsıonıster, reanımatologtar jáne pýlmonologtar kirdi.

Statsıonarlarda - dárilik zattardyń úsh aılyq qory, emhanalarda – bes aılyq qory qamtamasyz etilgen. Qan ortalyǵynda antıbakterıaldy plazma qory quryldy.

Oblysta 26 KT apparaty jumys isteıdi. PTR testin on zerthana jasaıdy, táýligine 15 600-ge jýyq zertteý júrgiziledi, 20 myńǵa deıin jetkizý múmkindigi bar.

Oblys ákimi medıtsınalyq uıymdardyń materıaldyq-tehnıkalyq bazasyn nyǵaıtýdy jalǵastyrýdy tapsyrdy.