Qaraǵandy oblysynda kún raıy boljamynyń dáldigi arta túsedi
JEZQAZǴAN. QazAqparat – Qaraǵandy oblysynda kún raıyna qatysty aqparat anaǵurlym dálirek bola túsedi. Bul Jezqazǵan qalasynda jańa radıolokator ornatqan soń múmkin bolyp otyr, dep habarlaıdy QazAqparat tilshisi.
Jezqazǵanda amerıkandyq radıolokator ornatyldy. Bul óńirdegi kún raıy boljamynyń dáldigin arttyrýǵa múmkindik beredi.
«Qazaqstannyń ulttyq gıdrometeorologııalyq qyzmetiniń mamandary Baron Services Inc amerıkandyq kompanııasynyń ókilderimen birlesip, Jezqazǵanda Dopler meteorologııalyq radıolokatoryn (DMRL) montajdaý men ornatý jumystaryn aıaqtady», - dep habarlady «Qazgıdromet» RMK baspasóz qyzmeti.
Jerústi meteojelisi derekterimen birge radarlardan alynǵan aqparat bir saǵattan bir táýlikke deıingi kezeńge kún raıy boljamdaryn jasaýǵa, boljamdardy túzetýge, eskertýlerdi ázirleýge múmkindik beredi.
