Qaraǵandy oblysynda «Kúmis jas» jobasy boıynsha 47 adam jumysqa ornalastyryldy

QARAǴANDY. QazAqparat – Qaraǵandy oblysynda jyl basynan beri «Kúmis jas» jobasy boıynsha 47 adam jumysqa ornalastyryldy. Zeınet jasyna deıingi adamdar úshin óńirde barlyǵy 534 bos jumys orny qarastyrylǵan.

«Bul baǵyt zeınetkerlikke shyǵýǵa eki jyly qalǵan adamdardy jumyspen qamtý máselesin sheshýge kómektesedi. Jumys berýshilerge «Kúmis jas» jobasy boıynsha jumysqa ornalasqandar jalaqysynyń 50 paıyzy sýbsıdııalanady, biraq ol soma 30 AEK-ten aspaýy tıis», - dep málim etti Qaraǵandy oblysynyń jumyspen qamtýdy úılestirý jáne áleýmettik baǵdarlamalar basqarmasynda.

Jumys uzaqtyǵy 12 aıdan aspaıdy, al joba aıaqtalǵannan keıin qatysýshyǵa zeınetke shyqqanǵa deıin turaqty jumys orny beriledi.

Jumysqa ornalasýǵa joldama alý úshin turǵylyqty jeri boıynsha halyqty jumyspen qamtý ortalyǵyna júginý qajet.

Esterińizge sala keteıik, «Kúmis jas» jobasy kásipkerlikti damytýdyń 2021—2025 jyldarǵa arnalǵan ulttyq baǵdarlamasy aıasynda júzege asyrylýda.