Qaraǵandy oblysynda qumaı tazy ósirý qaıta jańǵyrtylyp jatyr
QARAǴANDY. QazAqparat - Osakarov aýdany Ýyzbaı aýylynyń turǵyny Qazbek Ábdirahmanov qumaı tazy tuqymdy ıtterdi ósirý dástúrin qaıta jańǵyrtýmen aınalysýda. Onyń ıtteri birneshe jarystarda júldeli oryndardy ıelengen, dep habarlaıdy QazAqparat tilshisi.
«Qazaq úshin tazy árqashan jeti qazynanyń biri, qundy janýar sanalǵan. Osyndaı ıtterdi ósirip-baptaý onyń ıesine de, urpaqtaryna da erekshe jaýapkershilik júkteıdi. Biz ár janýarǵa uqypty qaraımyz, olardy óz balalarymyzdaı jaqsy kóremiz», - dep atap ótti Qazbek Ábdirahmanov.
Ol asyl tuqymdy ıtterdi qolǵa úıretýmen bala kezinen aınalysa bastaǵan. Endi óziniń bilgen-túıgenin ulyna úıretip júr.
Qazbek Ábdirahmanovta qazir bes eresek tazy jáne bir kúshik bar.
Ol respýblıkalyq «Qansonar» qaýymdastyǵymen belsendi jumys isteıdi. Aýyl jastaryna kókpar oıynyn úıretip jatyr.
«Bizdiń aýylda da, jalpy elimizde de ár adam óziniń túp-tamyryn umytpaı, ulttyq salt-dástúrin bilse deımin. Biz olardy urpaqtan-urpaqqa úıretýimiz kerek. Men jas aýyldastardan quralǵan komanda jınadym, kókpardan jarystarǵa qatysyp, jeńiske jettim», - deıdi ıt ósirýshi.
