Qaraǵandy oblysynda qulaǵan mektepten oqýshylar zardap shekken joq
QARAǴANDY. QazAqparat - Qaraǵandy oblysy Nura aýdany Balyqtykól aýylynda mekteptiń jartylaı qulaýy kezinde ǵımaratta bir de bir oqýshy bolmaǵan, tek jumysshy zardap shekken, dep habarlaıdy «QazAqparat» HAA tilshisi.
Qaraǵandy oblystyq bilim basqarmasynyń baspasóz qyzmeti habarlaǵandaı, mektepte qurylys kompanııasy jumys istep jatyr. «Mektepte jóndeý jumystary júrgizilýde, ol jerde oqýshylar bolmaǵan. Olar basqa ǵımaratta bilim alyp júr. Sáıkesinshe, bir de bir oqýshy zardap shekpegen», - dep habarlady bilim basqarmasynyń baspasóz hatshysy Mahabbat Eńsebaeva.
Oqıǵa ornynda tergeý-jedel toby jumys istep jatyr.
Eske salaıyq, búgin 9:40-ta Qaraǵandy oblystyq TJ departamentiniń kezekshilik bólimine Nura aýdany Balyqtykól aýylynda mektep ǵımaraty qurylysynyń qıraǵany jaıly habarlama kelip tústi. Jóndeý jumystaryn júrgizý kezinde ekinshi qabattaǵy tórt sharshy metrlik dálizdegi plıta jabyndysy qulaǵandyǵy anyqtaldy. Úıindiler astynda qalǵan bir adam qutqarylyp, Shahtınsk kentindegi aýrýhanaǵa jetkizildi.
