Qaraǵandy oblysynda qozǵalys ústindegi júk kóligi janyp ketti
QARAǴANDY. QazAqparat - Almaty-Ekaterınbýrg tasjolynyń Qaraǵandy oblysy Abaı qalasynyń mańynda avtokólik shınalary tıelgen «DAF» júk mashınasy tolyǵymen janyp ketti, dep habarlaıdy QazAqparat tilshisi.
Qaraǵandy oblysy boıynsha Tótenshe jaǵdaılar departamentinen málim etkendeı, zardap shekkender joq. Kólik júrgizýshisi qaýipsiz jerge júgirip shyǵýǵa úlgergen. Kólikten ot 20 qyrkúıek kúni keshki saǵat segiz jarym shamasynda Almaty-Ekaterınbýrg tasjolynyń 992-shaqyrymynda, Abaı qalasynyń mańynda tutanǵan.
«Oqıǵa ornyna jetken Órtke qarsy jáne apattyq-qutqarý qyzmetteri tilsiz jaýdy 21.06-da sóndirip, 21.14-te tolyǵymen joıdy. Órtti sóndirýge jeke quramnyń 12 adamy men úsh tehnıkasy jumyldyryldy», - dep habarlady TJD-dan.
Kóliktiń janý sebebi saraptama barysynda anyqtalatyn bolady.
