Qaraǵandy oblysynda qosymsha órt sóndirý stantsııalary ashylady

QARAǴANDY. QazAqparat – Qaraǵandy oblysynda orman órtin sóndirýge arnalǵan qosymsha stantsııalar uıymdastyrylady, dep habarlaıdy QazAqparat tilshisi ákimdiktiń resmı saıtyna silteme jasap.

Jergilikti quzyrly organ málimetinshe, oblysta órt sóndirýge arnalǵan tórt orman stantsııasy jumys isteıdi. Taıaýda Qaraǵandy jáne Aqtoǵaı ormanshylyqtarynda taǵy beseýin ashý josparlanyp otyr.

«Oblysta órt qaýipti kezeńde barlyǵy 322 tabıǵı órt pen ózge de janý oqıǵalary boldy. Orman órtteriniń kóp jaǵdaılary Qarqaraly jáne Buqar Jyraý aýdandarynda boldy. Tabıǵı órtter men janýlardyń paıda bolýyna ádetten tys ystyq kún raıy, qatty jel, jaýyn-shashynnyń bolmaýy, qurǵaq naızaǵaı yqpal etti. Sondaı-aq, keıbir jaǵdaılarda otty abaısyz paıdalaný, aýyl sharýashylyǵy tehnıkasynyń aqaýy, qurǵaq ósimdikterdi baıqaýsyzda órteý tilsiz jaýdyń taralýyna ákep soqty», - dedi oblystyq Tótenshe jaǵdaılar departamentiniń basshysy Murat Qatpanov.

Onyń aıtýynsha, sońǵy bes jylda oblysta 45 órt sóndirý beketi qurylǵan. Olar 50 myńǵa jýyq adam turatyn 82 eldi mekende jumys isteıdi.