Qaraǵandy oblysynda kóshe men mektepke 16 jyl buryn qaza tapqan mılıtsııa qyzmetkeriniń esimi berildi
QARAǴANDY. QazAqparat - Qaraǵandy oblysyndaǵy Shet aýdanynyń Taldy aýylynda osydan 16 jyl buryn qarýly qaraqshylardyń qolynan qaza tapqan mılıtsııa qyzmetkeri - Rýstam Májıtovtyń atyna kóshe berildi.
«Taldy aýylynda 16 jyl buryn qaýipti qarýly qylmyskerlerdi ustaý kezinde qaza tapqan mılıtsııa qyzmetkeri, aǵa leıtenant, osy jerdiń týmasy bolǵan R.Májıtovtyń esimi máńgi este saqtalmaq. Mundaǵy kóshege onyń esimi berilýi - sonyń dáleli. Budan basqa, endi kezinde Májıtov oqyǵan mektep te onyń esimimen atalady», - delinedi habarlamada.
2014 jyldyń qyrkúıeginde Qaraǵandydaǵy R.Májıtov turǵan úıde memorıaldyq taqta ashylǵan edi.
1998 jyldyń qarasha aıynda Qaraǵandy qalasyndaǵy qant ortalyǵyna qaraqshylyq shabýyl jasalǵan bolatyn. Mılıtsııa qyzmetkerleri taratylǵan aqparat boıynsha ishinde kúdiktiler otyrǵan kólikti toqtatty. Qujattardy tekserý kezinde olardyń biri tapanshadan oq jaýdyra bastady. Mılıtsııanyń aǵa leıtenanty R.Májıtovke alty oq tıip, sonyń saldarynan aýrýhanada kóz jumǵan. 26 jastaǵy marqumnyń artynda 4 jasar balasy qaldy. Qylmyskerler ustalyp, tıisti jazalaryn aldy.
