Qaraǵandy oblysynda qoryqtyń 11 qyzmetkeri «atys» týraly aqparat taratqany úshin jumystan bosatyldy
QARAǴANDY. QazAqparat - Qaraǵandy oblysy Ulytaý aýdanynda «Aq bóken» tabıǵı qoryǵynyń 11 qyzmetkeri brakonerler qoryqshylarǵa oq atty jáne olardyń kóligin órtedi degen jalǵan aqparat taratqany úshin jumystan bosatyldy, dep habarlaıdy «QazAqparat» HAA tilshisi.
«Aq bóken» qoǵamdyq tabıǵı qoryǵynyń qamqorshylyq keńesi brakonerlerdiń qoryqshylarǵa shabýyl jasaǵany týraly atyshýly is boıynsha qyzmettik tekseristi aıaqtady.
«On bir qyzmetker jumystan bosatyldy. Tek 6 qoryqshy ǵana emes, aýysymmen jumys isteıtinder de jumyssyz qaldy», - dedi qoryqtyń jumystan bosatylǵan dırektory Igor Mıloserdov jumystan bosatý týraly buıryqtyń ádiletsizdik ekenin alǵa tartyp.
Qyzmettik tekserý barysynda sol kúni janyp ketken avtokólikte bolǵan jáne sol aýysymda kezekshilik etken eki avtokóliktegi barlyq alty qoryqshy tyńdalǵan.
«Biz berilgen vıdeotaspany qarap, qoryqshylardyń bergen túsinikterin tyńdap jáne sarapshy Aleksandr Moşanetskııdiń qorytyndysy negizinde, apattyń janarmaı súzgisine jalǵasqan plastık evroqamyttardyń erip, sonyń saldarynan sańylaý paıda bolyp, benzınniń aqqanynan bolǵandyǵyn anyqtadyq. Aqqan benzın, shóptiń katalızatorynan tutanǵan órtke quıylyp, kólik janyp ketken», - dep atap ótti qyzmettik tekseristiń qorytyndysyna baılanysty qoǵamdyq tabıǵı qoryq qamqorshylyq keńesiniń múshesi Marǵulan Seısembaı.
Eske salaıyq, qoryq basshylyǵy qoryqshylarǵa silteme jasap qoryqty qorǵaıtyn ınspektorlardyń mashınasyna brakonerlerdiń shabýyl jasaǵany týraly habarlaǵan edi. Brakonerler sur tústi Lend Krýzermen kelip, oq atqan. Bul rette polıtsııaǵa shaǵym túsken joq. Polıtseıler aryz jazǵandy kútpeı, oqıǵa ornyna bardy. Mashına órtengen jerden olar oq tappady. Oq tıip, zaqymdanǵan iz de tabylmady. Polıtseıler «ÝAZ Patrıot» avtomobılinde qurǵaq shóp jınalyp qalǵannan órt tutanǵan jáne sonyń saldarynan kólik janyp ketken degen tujyrym jasady.
