Qaraǵandy oblysynda qoryqshylarǵa oq atylmaǵan - ІІD
QARAǴANDY. QazAqparat - Brakonerler «Aq bóken» qoryǵyn kúzetetin qoryqshylar kóligine oq atqany týraly áleýmettik jelide taraǵan aqparat jalǵan bolyp shyqty, dep habarlady «QazAqparat» HAA tilshisi.
Inspektorlarǵa qarsy brakonerlerdiń shabýyly jaıly aqparatty áleýmettik jelige jazyp, ınspektorlardyń tanysy almatylyq Marǵulan Seısembaı taratty.
«Brakonerler sury tústi Lend Krýzerde bolǵan», - dedi Almaty turǵyny Marǵulan Seısembaı, qoryqshylardy tanıtynyn, olarmen habarlasyp turatynyn atap ótip.
Bul rette polıtsııaǵa shaǵym túsken joq. Polıtseıler aryz jazǵandy kútpeı, oqıǵa ornyna bardy. Mashına órtengen jerden olar oq tappady. Oq tıip, zaqymdanǵan iz de tabylmady.
«Ulytaý aýdandyq ІІB qyzmetkerleri polıtsııa bólimine órtengen kólikte bolǵan 5 adamdy alyp keldi. Tergeý barysynda júrgizýshi men jolaýshylardyń aıǵaǵyna sáıkes, 6 maýsymda saǵat 18-de dalada olar kóliktiń shańyn baıqaıdy. Artynsha olar brakonerler bolýy múmkin degen oımen kóliktiń izine túsedi. Ony qýyp jete almaıdy. «Aq bóken» qoryǵynyń kóliginde qurǵaq shóp jınalyp qalǵannan, órt tutanǵan. Saldarynan kólik janyp ketken. Bul rette atys bolmaǵan, mashınany da eshkim órtemegen», - dedi ІІD baspasóz qyzmetiniń basshysy Baqytjan Qudııarov.
ІІD-da kórineý jalǵan aqparat taratý zańmen qýdalanatynyn eskertedi. Qazir polıtsııa halyqty aldaǵan ınspektorlar men áleýmettik jelide habarlama jarııalaǵan jazbanyń avtoryn jaýapkershilikke tartý týraly máseleni qaraýda.
