Qaraǵandy oblysynda kórshiniń úıinde shyqqan órtten birneshe adam qaza tapty
QARAǴANDY. QazAqparat - Balqashta órt saldarynan eki jasar bala men onyń ata-anasy jáne bir qabat tómen turatyn kórshisi qaza tapty, dep habarlaıdy «QazAqparat» HAA tilshisi.
Bes qabatty turǵyn úıde shyqqan órt saldarynan birinshi jáne ekinshi qabatta turǵan tórt adamnyń máıiti tabyldy.
Qaraǵandy oblystyq TJ departamentiniń baspasóz qyzmeti habarlaǵandaı, №45 órt sóndirý jáne apattyq-qutqarý qyzmetine apat týraly habar 22:43-te kelip túsken.
«Kireberistegi páterlerden 14 adam evakýatsııalandy. Páterlerdi tekserý barysynda ekinshi qabattan úsh adamnyń - er kisi, áıel adam men balanyń máıiti tabyldy. Bul páterde órttiń shyǵý belgileri tabylmady», - dep málimdedi TJ departamentiniń baspasóz qyzmetindegiler.
Tilsiz jaý úıdiń birinshi qabatynan bastaý alǵan. Órttiń aýmaǵy 30 sharshy metrdi quraıdy.
«Aýmaqtaǵy órt saǵat 23:35-te aýyzdyqtaldy. Órt sóndirý barysynda bólmelerdiń birinen osy páterde turǵan er kisiniń máıiti tabyldy. Órttiń sebebi anyqtalýda», - dep habarlady TJ departamentiniń baspasóz qyzmetindegiler.
