Qaraǵandy oblysynda koronavırýspen kúreske 540 medıtsınalyq qyzmetker tartyldy
QARAǴANDY. QazAqparat - Qaraǵandy oblysynda tótenshe jaǵdaı rejimi 16 naýryzdan bastap jumys isteıdi. Óńir qoımalary azyq-túlikpen qamtamasyz etilip, aýrýhanalar kúsheıtilgen jumys rejimine kóshýde. Oqýshylar men stýdentter demalysqa jiberildi, dep habarlaıdy QazAqparat tilshisi.
Qazir oblysta juqpaly ınfektsııany emdeý úshin 300 jáne COVID – 19 koronovırýsymen aýyratyn naýqastardy ońaltý úshin 48 tósek qarastyrylǵan. Sondaı-aq 770 provızorlyq jáne 1 325 karantın tósegi bar. Olar Qaraǵandy, Temirtaý, Balqash jáne Sátbaev qalalarynyń aýrýhanalarynda ornalasqan.
Gospıtaldarda jumys isteý úshin dárigerlerdiń 4 mýltıstsıplınarlyq komandasy belgilengen. Olardyń quramyna ınfektsıonıst, pýlmonolog, kardıolog, nefrolog, terapevt jáne pedıatr kiredi. Sonymen qatar 3 anestezıolog–reanımatolog brıgadasy, orta jáne kishi medıtsına qyzmetkerlerinen 9 brıgada uıymdastyryldy. Jumysqa barlyǵy 540 medıtsınalyq qyzmetker tartyldy. Karantındik jumys kestesi bekitildi.
Búgingi kúni karantınde 113 adam táýlik boıy baqylaýda. Bul 1A sanatyndaǵy elderden oralǵan nemese shartty túrde juqtyrǵandarmen baılanysta bolǵan azamattar. Úı karantıninde 39 adam, medıtsınalyq baqylaýmen ózin–ózi oqshaýlaýda - 284 adam, qashyqtyqtan monıtorıngide - 273 adam. Olardyń barlyǵy ózderin jaqsy sezinedi, aýrý belgileri joq.
Oblystyń turaqtandyrý qorynda 300 tonna bıdaı uny, 24,5 tonna qaraqumyq jarmasy, 37,6 tonna kúnbaǵys maıy, 189 tonna qant, 1700 tonna kartop, 30 tonna sábiz, 50 tonna pııaz jáne 50 tonna oramjapyraq bar. Qosymsha qaraqumyq jarmasy, kúrish, kúnbaǵys maıy men kókónis satyp alýd josparlanyp otyr.
Sondaı-aq óńirde un óndirý úshin jetkilikti astyq qory bar.
Azyq-túlik taýarlarynyń baǵasy kóterilmeıdi. Ázirge tek qant baǵasy sál artty - bul ónimdi shyǵarýshy Belarýs zaýytynda ózindik qunynyń qymbattaýyna baılanysty.
Oblysta azyq-túlik úzdiksiz jetkizilýde. Kólik qatynasynda problemalar joq. Óńirdiń barlyq avtoparkteri burynǵy tártipte, marshrýttardy qysqartýsyz jumys isteıdi. Qaraǵandy qalasynan Almaty, Qyzylorda, Óskemen jáne Jezqazǵan qalalaryna jolaýshy poıyzdary esh ózgerissiz júredi.
Reseımen kólik qatynasy toqtatyldy. Tikeleı jolaýshylar poıyzdary, tirkeme jáne tikeleı qatynaıtyn vagondar toqtatyldy. Buryn satyp alynǵan bıletterdi qosymsha tólemsiz jáne aıyppulsyz tapsyrýǵa bolady. Sondaı-aq áýe qatynasy toqtatyldy. 18 naýryzda Qaraǵandy-Máskeý baǵytyndaǵy sońǵy reıs oryndaldy. 19 naýryzdan bastap osy baǵyt boıynsha ushý toqtatylady. Sondaı-aq, 17 naýryzdan bastap Qaraǵandydan Novosibir qalasyna avıareı toqtatyldy.
Oblysta AI-92/93 benzıni men dızel otynynyń qory jetkilikti.
Barlyq nysandar oblystyń iri kásiporyndary shtattyq rejimde jumys isteıdi. Oblystyq kommýnaldyq qyzmet mamandary da burynǵy rejimde jumys isteıdi. Sý, jylý jáne elektr energııasy berýde irkilis joq.
Barlyq oqýshylar 16 naýryzdan bastap demalysqa jiberildi. Jaqyn arada olar barlyq pánderden óz betinshe oryndaý úshin tapsyrma alady.
Oblysta barlyǵy 507 jalpy bilim beretin mektep bar. Onda 198 571 bala oqıdy jáne 17 792 pedagog jumys isteıdi. Qazir oqytýshylar qashyqtan jumys isteıdi.
Sonymen qatar, óńirde 10 arnaıy túzetý mektep-ınternaty bar. Onda 1 053 bala oqıdy. Olardyń barlyǵy da qazir kanıkýlda.
Oblysta qosymsha bilim berý uıymdarynyń sany 100, onyń ishinde 88 memlekettik. Onda 75 421 bala oqıdy. Qazir mektepten tys uıymdardyń qyzmeti ýaqytsha toqtatyldy.
Sondaı-aq óńirde 70 kolledj jumys isteıdi. Olardyń barlyǵy elektrondyq oqytý platformasyna qosylǵan.
Tek 70 stýdenttiń ınternetke qosylý múmkindigi joq. Olar úshin arnaıy oqytý «Qazposhta» AQ qyzmeti arqyly júzege asyrylady.
Qalǵan 36 900 stýdent Bilimal, Platonus, Smart College jáne Moduls júıeleriniń kómegimen oqıdy. Sabaqtar beıne sabaqtar, derbes onlaın-jumystar, onlaın kýrstar, chat sabaqtar, veb sabaqtar, telekonferentsııa jáne telesabaqtar túrinde ótedi.
