Qaraǵandy oblysynda kópqabatty úılerde lıftiler jańartylyp jatyr
2022 jyly Qaraǵandy, Temirtaý jáne Balqash qalalaryndaǵy kópqabatty úılerde 53 kótergish ornatyldy. Bul jumys odan ári de jalǵasady. Oblys ortalyǵynda bıyl 25 lıftti aýystyrý josparlanyp otyr.
Oblys ákimdiginde turǵyn úı-kommýnaldyq ınfraqurylymdy damytýdyń 2026 jylǵa deıingi tujyrymdamasy usynyldy. Bul qujat halyqtyń sapaly qyzmetterge qoljetimdiligin arttyrýǵa, jeliler men tazartý qurylystaryn jańǵyrtýǵa baǵyttalǵan. Sondaı-aq joba turǵyn úı qoryna qatysty sharalardy qamtıdy: qasbetterdi, shatyrlardy, lıftilerdi jóndeý, apatty jáne tozyǵy jetken úılerdi buzý.
«2023 jylǵa arnalǵan josparda sýmen jabdyqtaý qyzmetterine halyqtyń qoljetimdiligin qalalarda – 98,8%, aýyldarda 93,7% deıin jetkizý kózdelgen. Sýmen jabdyqtaý jelilerin salý jáne rekonstrýktsııa boıynsha 15 joba josparlanyp otyr. Budan basqa, 200-den az halqy bar aýyldarda sýdy blok-modýl arqyly tazartý keshenderi ornatylatyn bolady», – dedi energetıka jáne TKSh basqarmasynyń basshysy Qaırat Begimov.
Onyń aıtýynsha, bıyl jylýmen jabdyqtaý salasynda toǵyz joba josparlanǵan. Olardy iske asyrý jelilerdiń tozýyn azaıtýǵa múmkindik beredi. Al 2026 jylǵa deıin bul salada 27 joba josparlanǵan.
Qaraǵandyda 1979 jyly salynǵan tazartý qurylystaryn qaıta jańartý qajet. Joba 2024–2026 jyldarǵa josparlanǵan. Qazirgi ýaqytta tehnıkalyq-ekonomıkalyq negizdeme ázirlenýde.
Turǵyn úı-kommýnaldyq sharýashylyqty damytý tujyrymdamasy sonymen qatar úılerde jylý jáne sýdy esepke alý qurylǵylaryn ornatýdy ulǵaıtý kózdelip otyr. 2026 jylǵa qaraı bul kórsetkish 100% jetýi kerek.
Oblys ákimi Ermaǵanbet Bólekpaev ınjenerlik jeliler men jergilikti jylý kózderin tehnıkalyq tekserý jónindegi is-sharalar josparyn bekitýdi tapsyrdy. Sondaı-aq, energııa obektilerin tekserý qajettili týraly aıtyp ótti.
Foto: Qaraǵandy oblysy ákimdiginiń baspasóz qyzmeti