Qaraǵandy oblysynda kópqabatty úıdegi órtten 1 adam kóz jumdy
QARAǴANDY. QazAqparat – Qaraǵandy oblysynyń Jańaarqa kentinde kópqabatty úıdiń birinshi qabatynda úsh bólmeli páter órtenip ketti, dep habarlaıdy QazAqparat tilshisi.
Órt sóndirýshiler joǵarǵy qabattaǵy páterlerdiń birinde es-tússiz jatqan eki áıeldi taýyp aldy. Olardyń biri qaıtys boldy, ekinshisi aýyr halde.
«25 maýsym kúni saǵat 19:22-de Qaraǵandy oblysy, Jańaarqa aýdany, Jańaarqa kentinde bolǵan órt týraly habarlama kelip tústi. Órt sóndirý bólimsheleri kelgen sátte úsh qabatty turǵyn úıdiń 1-qabatyndaǵy aýdany 60 sharshy metr úsh bólmeli páterdi ot sharpyǵany anyqtaldy.
Janyp jatqan páterden baspaldaq marshy boıynsha 4 adam, onyń ishinde 3 bala qutqaryldy. Sondaı-aq, joǵarǵy qabattardyń páterlerin tekserý kezinde 3-qabattaǵy páterlerdiń birinen kómirqyshqyl gazymen ýlaný belgileri bar es-tússiz jatqan eki áıel tabyldy. Zardap shekkenderdiń biri, 1969 jyly týǵan áıel aýrýhanada qaıtys boldy, 1961 jyly týǵan ekinshi áıeldiń jaǵdaıy aýyr. Zardap shekken úı turǵyny kórý qabileti nashar múgedek, al qaıtys bolǵan kelinshek onyń kómekshisi bolǵan», - dep habarlady Qaraǵandy oblysy TJD baspasóz qyzmetinen.
Órt saǵat 20:11-de sóndirildi. Onyń shyǵý sebebi anyqtalýda. Oqıǵa ornynda Qaraǵandy oblysy TJD synaq zerthanasynyń mamandary jumys isteıdi.
