Qaraǵandy oblysynda kópqabatty turǵyn úı baspaldaǵy opyrylyp tústi
QARAǴANDY. QazAqparat - Temirtaýǵa jaqyn mańdaǵy Aqtaý kentindegi besqabatty turǵyn úı baspaldaǵy qulap, odan eshkim zardap shekken joq, dep habarlaıdy «QazAqparat» HAA tilshisi.
Temirtaý ákimdiginiń baspasóz hatshysy Olga Gorıachevanyń habarlaýynsha, tótenshe jaǵdaı besinshi oramdaǵy №2 úıde bolǵan.
«30 mamyr kúni Aqtaýdaǵy 5 oramdaǵy №2 úıdiń baspaldaq alańy opyrylyp tústi. Quramyna Temirtaý ákiminiń orynbasary, Aqtaý kentiniń ákimi mindetin atqarýshy, tótenshe jaǵdaılar, turǵyn úı-kommýnaldyq sharýashylyǵy, qurylys basqarmalary, turǵyn úı ınspektsııasy jáne taǵy basqa vedomstvonyń ókilderi kiretin jumys toby turǵyn úıdi qarap shyqty. Turǵyn úıdiń turýǵa jaramsyz ekendigi anyqtaldy. Sebebi onyń qabyrǵasynda jaryqtar paıda bolyp, irgetasy otyrǵan jáne jertólesine fekaldy jáne jer asty sýlary jınalǵan», - dedi Olga Gorıacheva.
TJ bolǵan kezde úıde jeti otbasy - 14 adam turyp jatqan. Sonyń ishinde - 11 eresek pen eki bala. Úı men páterler antısanıtarlyq jaǵdaıda tur. Turyp jatqandardyń basym bóligi - ózdiginen qonystanǵan turǵyndar.
«Qazirgi tańda úıdegi elektr jáne sý óshirildi. Turǵyndar týystaryna jiberildi. Aqtaý kentiniń jergilikti polıtsııa qyzmeti tonaýshylyqqa jol bermeý maqsatynda úıdi kúzetip jatyr. Ahýaldy Temirtaý ákiminiń jiti baqylaýynda», - dep habarlady O. Gorıacheva.
