Qaraǵandy oblysynda kópfýnktsıonaldy sport kesheni ashyldy
QARAǴANDY. QazAqparat – Qaraǵandy oblysy Nura aýdanynda aýa tireýish munara bazasynda kópfýnktsıonaldy sport kesheni iske qosyldy. Onda zamanaýı júgirý joly, fýtbol, basketbol, gandbol, tennıs oıyndaryna arnalǵan kópfýnktsıonaldy alań, sonymen qatar kúres, boks jáne ústel tennısi alańdary bar, dep habarlaıdy QazAqparat tilshisi.
Nysan «Samuryq-Qazyna» aktsıonerlik qoǵamynyń qarajaty esebinen salynǵan. Joba ınvestıtsııalyq qaıyrymdylyq bolyp tabylady.
Qaraǵandy oblysy ákiminiń orynbasary Abzal Núkenov nuralyqtardy óńirde zamanaýı sport nysanynyń paıda bolýymen quttyqtady.
«Nura aýdanynyń jastaryna jańa rekordtarǵa qol jetkizý úshin bastaý berildi. Sport kesheniniń tárbıelenýshileri olımpıadalardyń jáne basqa da aýqymdy jarystardyń naǵyz chempıondary, júldegerleri bolatynyna senimdimin. Ótken jyly bizdiń oblysta 125 sport nysany paıdalanýǵa berildi. Bıyl taǵy 58-in ashýdy josparlap otyrmyz», – dedi keshenniń ashylýynda Abzal Núkenov.
Aýdan ákimi Aıan Shalmaǵanbetov Shahterskıı aýyly men Nura kentinde bıyl basseın men jabyq hokkeı kortyn ashý josparlanǵanyn atap ótti.
«Munyń barlyǵy aýdan turǵyndary úshin jasalýda. Densaýlyq – zor baılyq! Meniń oıymsha, bizde oblystyń ǵana emes, elimizdiń eń úzdik sportshylary ósedi», – dedi Aıan Shalmaǵanbetov.
Sport kesheniniń ashylý saltanatyna qatysqan jergilikti BJSM tárbıelenýshileri fýtbol, voleıbol, ústel tennısi boıynsha kórneki oıyndar men qazaq kúresi, boks jáne MMA jekpe-jekteriniń úzindilerin kórsetti.
