Qaraǵandy oblysynda kópbalaly otbasylarynyń balalaryn tegin súndetke otyrǵyzady
QARAǴANDY. QazAqparat - Atalmysh qaıyrymdylyq aktsııasy oblystyq balalar klınıkalyq aýrýhanasynda iske qosyldy. Shara barysynda 21 balaǵa hırýrgııalyq kómek kórsetiletin bolady, dep habarlaıdy QazAqparat tilshisi.
Tsırkýmtsızııa (súndetteý) protsedýrasy fımoz sııaqty kórsetkishter bolǵanda ǵana tegin oryndalady. Al balasyn dástúrge saı súndetke otyrǵyzǵysy keletinderge jeke dárigerlerge ótinish berip, 20-dan 30 myń teńgege deıin qarajat berýge týra keledi. Qaraǵandy oblysynyń Densaýlyq saqtaý basqarmasynda osy rásimdi óz betinshe tóleýge múmkindigi joq, kóp balaly otbasylardyń tizimi jasaldy. Er balalarǵa oblystyq balalar klınıkalyq aýrýhanasynyń úzdik hırýrg-ýrologtary ota jasaıdy.
«Biz ár otbasyna qońyraý shalyp, keste qurdyq: ata-analarǵa qandaı kúni tsırkýmtsızııa ótkizýge yńǵaıly bolady. Protsedýra aldynda balalar tekserýden ótip, qajetti taldaýlardy tapsyrýy tıis. Qazirgi tańda 11 balaǵa operatsııa jasaldy», -deıdi oblystyq balalar klınıkalyq aýrýhanasynyń dırektory Arǵyn Bıdaıbaev.
Shara barysynda súndetke otyrǵyzylatyn eń kishkentaı patsıent - 3 jasta, eń úlkeni - 5 jasta. Tsırkýmtsızııa jasaýǵa jarty saǵattaı ýaqyt ketedi jáne jergilikti anestezııamen júrgiziledi.
