Qaraǵandy oblysynda kópbalaly otbasylar baspanaly boldy

SÁTBAEV. QazAqparat - Qaraǵandy oblysynda kópbalaly otbasylardy baspanamen qamtamasyz etý jalǵasýda. Bul, qazirgi tańda basym baǵyttardyń biri bolyp tabylady. Sátbaevta 15 kópbalaly otbasy qonys toıyn atap ótti, dep habarlaıdy QazAqparat tilshisi.

Páterlerdi óz qyzmetkerlerine «Qazaqmys» korporatsııasy berip otyr.

«Memleket basshysyny tapsyrmasymen kópbalaly otbasylarǵa erekshe nazar aýdarylýda. Tamyzdyń sońynda bizdiń qalada 22 kópbalaly otbasy páter kiltin aldy. Bul Konstıtýtsııa kúnine oraı tamasha syılyq boldy. Al búgin biz «Qazaqmys» korporatsııasy jıhazben jáne yńǵaıly ómir súrýge qajetti barlyq jabdyqtarmen qamtamasyz etilgen 15 tórt bólmeli páterdi osy óndiris oshaǵynda jumys isteıtin kópbalaly qyzmetkerlerine satyp alǵanyna kýá bolyp otyrmyz», - dedi Sátbaev qalasynyń ákimi Asqar Ydyrysov jańa páter ıelerine kiltterdi tabys etý saltanatynda.

Barlyq páterler Shatalıýk kóshesindegi jańa bes qabatty úıde ornalasqan. Bul - dúken jáne mektep ornalasqan yńǵaıly shaǵynaýdan. Sonymen qatar bul jerde jańa balabaqsha men Oqýshylar saraıy salynyp jatyr.

Qala ákimi kompanııa basshylyǵyna kópbalaly otbasylarǵa kóńil bólip, jaǵdaı jasap jatqany úshin alǵysyn bildirdi. Páter kiltterin «Qazaqmys» korporatsııasynyń damý jónindegi dırektory Bahtııar Qyryqpyshev tabys etti.

Qonys toıyn toılaýshylar arasynda bes bala tárbıelep otyrǵan jalǵyzbasty áke bar. Sonymen qatar jańa páter segiz balasy bar otbasyna berildi.