Qaraǵandy oblysynda kópbalaly otbasylar balabaqshalarda 50% jeńildik alady
Oblys ákimdiginiń baspasóz qyzmetinen málim etkendeı, bilim salasy boıynsha alty baǵyt qarastyrylǵan.
«Sondaı sharalardyń biri - kópbalaly otbasylarǵa balabaqshalarda tamaqtaný tólemine 50 paıyzdyq jeńildik qarastyrylǵan. Mysaly, Qaraǵandyda balabaqshaǵa barý aıyna 11 myń teńge turady. Eger otbasynda úsh bala bolsa, onda qıyndyq týdyratyny belgili. Bekitilgen erejelerge ózgerister engizýge ýaqyt kerek. Biz óz usynysymyzdy berdik. 2019 jyldyń 1 qyrkúıeginen bastap norma engiziledi», - dep habarlady Bilim basqarmasynyń basshysy Esenǵazy Imanǵalıev.
Onyń sózinshe, kópbalaly jáne az qamtylǵan otbasylardyń bastaýysh synypta oqıtyn balalary úshin mektepterde tegin ystyq tamaq berý qarastyrylǵan. Bul maqsatta bıýdjettiń 107, 4 mln teńgesi jumsalady.
Basqa da qoldaý sharalary boıynsha 1-4 synyp oqýshylaryna uzartylǵan top, mektep janyndaǵy lagerlerde 1-9 synyp oqýshylaryna tegin demalys uıymdastyrylady. Ol úshin de qarajat qarastyrylǵan.
5,5 mlrd teńge tegin tehnıkalyq bilim berýge qarastyrylǵan. Bul aqsha 800 grantqa jetkilikti.
Járdemaqynyń jańa júıesi kópbalaly otbasylarǵa qalaı áser etetini týraly Jumyspen qamtýdy jáne áleýmettik baǵdarlamalardy úılestirý basqarmasynyń basshysy Ásem Júnispekova málim etti.
2019 jyldyń 1 shildesinen Qazaqstanda kedeıshilik sheginiń kórsetkishi 50-den 70 paıyzǵa deıin kóteriledi - 14 849-nan 20 789 teńgege. Budan bólek, az qamtylǵan otbasylarǵa aı saıyn 20 789 teńge kóleminde kómek kórsetiledi.
«Máselen, tórt bala tárbıeleıtin ananyń aı saıynǵy tabysy 50 myń teńge delik. Búginde ol 22 446 teńge kóleminde ataýly áleýmettik kómek alyp otyr. 1 shildeden bastap osyndaı kirispen otbasy 94 myń teńge alady, ıaǵnı járdemaqy 4 ese ósedi», - dep mysal keltirdi Ásem Júnispekova.
Onyń málimetinshe, búgingi tańda oblysta ataýly áleýmettik kómekti 2100 otbasy alady, bul 10 600 adam degen sóz. Jańa júıe bul kórsetkishti ulǵaıtatyny kútilýde.
Kómekke muqtaj barlyq otbasylardy anyqtaý úshin áleýmettik qorǵaý qyzmetiniń mamandary aýlalardy aralaıtyn bolady.
Sonymen qatar, 1 maýsymnan bastap oblystyń iri qalalarynda kópbalaly analarǵa qoǵamdyq kólikte tegin júrý múmkindigi beriledi.
