Qaraǵandy oblysynda kommýnaldyq tarıfter 5%-ǵa tómendedi
QARAǴANDY. QazAqparat - Qaraǵandy oblysynda kommýnaldyq qyzmetterge tarıfter tómendedi. Karantın aıaqtalǵanǵa deıin turǵyndar ótemaqyny 5%-ǵa az tóleıdi. Bul týraly selektorlyq rejımde ótken apparattyq keńeste aıtyldy, dep habarlaıda QazAqparat tilshisi.
«Búginde kommýnaldyq qyzmet tarıfterin 5%-ǵa tómendetý boıynsha kelisim bar. Bul Qaraǵandy oblysy boıynsha jeke tulǵalar úshin elektr, jylýmen, sýmen qamtý jáne sý aǵyzý qyzmetteri. Atalmysh máseleni erekshe baqylaýda ustańyzdar. Tarıfter 1 sáýirden bastap karantın aıaqtalǵanǵa deıin tómendetiledi», - dedi Qaraǵandy oblysynyń ákimi Jeńis Qasymbek.
Sondaı-aq suıytylǵan munaı gazynyń baǵasy tómendeıdi. Ol 73 teńgeni quraıdy.
Karantın kezeńinde kommýnaldyq tólemder boıynsha ótemaqyny keıinge qaldyrýǵa bolady. Bereshekter ústine ósimpuldar men aıyppuldar eseptelmeıdi.
Qaraǵandy, Temirtaý, Saran, Abaı jáne Shahtınsk qalalarynda kommýnaldyq kásiporyndardyń barlyq abonenttik bólimderi jabyldy. Qyzmetti ınternet-qosymshalar nemese termınaldar arqyly tóleýge bolady.
Aıta ketý kerek, óńirde jylytý maýsymy aıaqtalýǵa jaqyn. Qarajal jáne Prıozersk qalalarynda qazirdiń ózinde jylý berý toqtatyldy. Qalǵan qalalar men aýdandarda jylý keste boıynsha berilýde. Óńir boıynsha barlyq eldi mekenderde jylytý júıesi birinshi mamyrda jumysyn toqtatady.
Jalpy jylytý maýsymy shtattyq rejımde ótýde. Sáýir aıynyń basynda oblystyń energııa kózderinde jóndeý naýqany bastaldy.
