Qaraǵandy oblysynda komqyzmetke ótemaqy alýǵa 33 myńnan astam adam ótinim tapsyrdy

QARAǴANDY. QazAqparat – Qaraǵandy oblysynda kommýnaldyq qyzmetterdi óteý esebine 15 myń teńge alýǵa 33 133 adam ótinish berdi. Onyń ishinde 12 350 ótinim maquldandy. Bul týraly Energetıka jáne turǵyn úı-kommýnaldyq sharýashylyq basqarmasynyń basshysy Ulantaı Úsenov málim etti, dep habarlaıdy QazAqparat tilshisi.

Eń basty ózgeris – eger buryn memlekettik tólem aýdarylǵan abonenttik shot ótinish berýshiniń ózine ǵana tıesili bolý kerek bolsa, qazir aqsha osyndaı kómek túrine tıisti adamdarmen birge turatyn otbasy músheleriniń biriniń shotyna da aýdarylady.

Turǵyn úıdi jalǵa alatyn jáne áleýmettik jaǵynan osal toptarǵa kiretinderge keler bolsaq, kommýnaldyq ótemaqy alý úshin burynǵysynsha páterdi jalǵa alý boıynsha resmı kelisimshart qajet. Tek osy qujat bolǵan jaǵdaıda ǵana 15 myń teńge esepteledi.

Materıaldyq kómek beriletin adamdardyń sanattary burynǵysynsha ózgerissiz qaldy. Tólemder kelesi sanattaǵy azamattarǵa beriledi: barlyq toptaǵy múgedekter; soǵys ardagerleri men múgedekteri jáne olarǵa teńestirilgen adamdar; múgedek balalardy tárbıelep otyrǵan otbasylar; kóp balaly otbasylar; eń tómengi jáne odan tómen zeınetaqy alatyn zeınetkerler; jalǵyz basty zeınetkerler; memlekettik nemese qoǵamdyq mindetterin, áskerı qyzmetin oryndaý kezinde, ǵaryshqa ushýlardy daıyndaý nemese júzege asyrý kezinde qaza tapqan adamdardyń otbasylary jáne t. b. AÁK alýshylar.

Ótinish berý úshin Qaraǵandy oblysynyń energetıka jáne turǵyn úı - kommýnaldyq sharýashylyq basqarmasynyń saıtynda formany toltyrý qajet (JSN, áleýmettik mártebe jáne jeke shot derekterin kórsete otyryp) - https://oblenergetika.kz/. Ótinimderdi sondaı-aq [e-mail] elektrondyq poshtasyna jiberýge bolady. Qarajat aqshany alýshynyń abonenttik shotyna avtomatty túrde aýdarylady jáne tólengen túbirtek keledi. Jazbasha nemese aýyzsha jaýap normasy joq. Materıaldyq kómek esepteldi ma, joq pa, kelesi túbirtekti alǵan kezde ǵana bilýge bolady. ıAǵnı, bul aqsha birden kommýnaldyq qyzmet kórsetýshi kompanııaǵa aýdarylady. Al eger shot tólengen bolsa, onda olar artyq tólem retinde qalady jáne kelesi tólem kezinde eskeriletin bolady.

Sáýir aıyna arnalǵan kommýnaldyq qyzmetter úshin shotty óteýge ótinimder 25 mamyrǵa deıin qabyldanady. Sáýir aıynda tólengen túbirtekter kelgen soń, kelesi aıǵa ótinim berýge bolady. Osylaısha, ótinishti eki ret berý kerek.

Ulantaı Úsenov sondaı-aq karantın kezinde kommýnaldyq qyzmetterge shottardy tólemegeni úshin ósimaqylar men aıyppuldar eseptelmeıtindigin atap ótti.

Esterińizge sala keteıik, áleýmettik jaǵynan osal azamattar kommýnaldyq qyzmetterdi tóleý esebinen 15 myń teńge ala alady. Bul somany qyzmet kórsetýshi kompanııadaǵy alýshynyń abonenttik shotyna birden aýdarady. Eger jalpy esep bir aıda 15 myń teńgeden kem bolsa, qalǵan aqsha kelesi aıda qyzmetterdi tóleýge avtomatty túrde aýdarylady.