Qaraǵandy oblysynda kómir qabatynan metan óndirý jobasy júzege asyrylyp jatyr
ASTANA. QazAqparat - Qaraǵandy oblysynyń ákimi Erlan Qoshanov kómir qabatynan metandy barlaý jáne óndirý boıynsha jobanyń júzege asyrylýynyń aldyn ala nátıjelerimen tanysyp shyqty. Abaı aýdanyndaǵy Sherýbaı-Nura ýchaskesinde geologııalyq jumystar júrgizilýde - tájirıbelik-óndiristik uńǵymalar ıgerilip jatyr. Gaz shyqty jáne ony dala alqaptaryndaǵy tutanǵan ot shyraqtary rastaıdy.
Esterińizge sala keteıik, Qaraǵandy oblysynda kómir qabatynan metandy barlaý jáne óndirý boıynsha joba Elbasynyń tapsyrmasy boıynsha júzege asyrylyp jatyr. Basty maqsat - kenshilerdiń jumysyn qaýipsiz etý. Oǵan qosa, jobanyń sátti iske qosylýy elimizde jańa otyn-energetıkalyq salany qurýǵa septigin tıgizetin bolady. Metan - balama energııa tasymaldaýshy bolyp tabylady, onyń qory óte joǵary. Bolashaqta ony Astana men Qaraǵandyny gazdandyrý úshin paıdalanýǵa bolady.
Sherýbaı-Nura ýchaskesinde joba jergilikti ǵalymdardy jumyldyrý arqyly «Saryarqa ÁKK» UK» AQ jáne «KazTransGaz» AQ birlesip júzege asyrylýda. Munda 8 uńǵyma qazylǵan, onyń úsheýi kern alýǵa arnalǵan barlaý uńǵymalary jáne beseýi - tájirıbelik-óndiristik.
- Bul óte ózekti baǵyt. Osydan ondaǵan jyldar buryn bizdiń aldymyzda shahtalardy gazdan tazartý problemasy turǵan. Búginde biz sol jolmen kele jatyrmyz. Eń bastysy - tájirıbelik-óndiristik uńǵymalar oń nátıje berdi. Alaıda qabattardyń ótkizgishtigin anyqtaý úshin zertteýlerdi jalǵastyra berý kerek, - dedi kómir salasynyń ardageri, tehnıkalyq ǵylymdardyń doktory, professor Nıkolaı Drıjd.
Mamandar ýchaskede qabattardy gıdro ajyratý ádisin qoldanady. Osy sekildi tehnologııa Qaraǵandy oblysynyń kómir basseınderindegi tyǵyz qabattarǵa anaǵurlym yńǵaıly. Barlaý jumystaryna shamamen 2 mlrd teńge ınvestıtsııalanǵan.
Іriktelgen kern AQSh, Germanııa jáne Polsha elderiniń zerthanalarynda zerttelgen. Alynǵan málimetter metandy óndiristik shyǵarý úshin ýchaskeniń áleýetti ekenin dáleldeıdi.
Sherýbaı-Nura ýchaskesi boıynsha qordy baǵalaý jumysy kútip tur. Ol úshin osy jyly merzimi aıaqtalǵan kelisimshart ýaqyty taǵy eki jylǵa sozyldy. Osy kezeńdegi jumystyń quny jobalaý nátıjesi boıynsha anyqtalady. Qazir áleýetti ınvestorlar izdestirilýde.
Erlan Qoshanov aımaǵymyz jáne jalpy elimiz úshin jobanyń júzege asyrylýy mańyzdy ekenin atap ótti. Aımaq basshysy ári qaraıǵy damý kezeńderinde paıda bolǵa máselelerdi sheshýde qoldaý kórsetetinin jetkizdi.
Kómir óndiretin ken oryndaryndaǵy potentsıaldy metan qory boıynsha Qazaqstan álemdegi jetekshi 10 el qataryna kiredi. Geologtyq barlaý jáne baǵalaý jumystary aıaqtalǵan soń gaz qoryn memlekettik paıdaly qazbalar balansyna qoıý sharalary júrgiziletin bolady.
