Qaraǵandy oblysynda qoljetimdi turǵyn úı qurylysy úsh esege artady
QARAǴANDY. QazAqparat - Qaraǵandy oblysynda 2020 jyly qarjylandyrýdyń barlyq baǵyttary boıynsha 630 myń sharshy metr turǵyn úı salý josparlanýda, dep habarlaıdy QazAqparat tilshisi.
Ótken jylmen salystyrǵanda turǵyn úı qurylysy bir jarym esege ulǵaıǵan. Sonymen birge kezekte turǵandardy qamtamasyz etý úshin qoljetimdi turǵyn úı salýdy úsh ese arttyrý kózdelýde.
Qurylys, sáýlet jáne qala qurylysy basqarmasynyń basshysy Taıhan Qalmahanov óńirdegi turǵyn úı máselesin qalaı sheshý kerektigin aıtty.
«Nurly jer» memlekettik baǵdarlamasy aıasynda Qaraǵandy oblysy boıynsha 2019 jyly qarjylandyrýdyń barlyq kózderi esebinen 421 myń sharshy metr turǵyn úı paıdalanýǵa berildi. Bul 3781 páter, onyń ishinde 1148-jalgerlik jáne nesıelik turǵyn úı. 2020 jyly turǵyn úıdi iske qosýdy 630 myń sharshy metrge deıin, ıaǵnı bir jarym ese ulǵaıtý josparlanýda. Memlekettik qarajat esebinen páterler kóp salynatyn bolady», - dedi baıandamashy.
Qala jáne aýdan ákimdikterimen birge Qaraǵandy oblysy boıynsha 2020-2025 jyldarǵa arnalǵan turǵyn úı qurylysyn damytý josparynyń jobasy ázirlendi, dep habarlady ol. Qujatta aýqymdy josparlar týraly aıtyldy – taıaý besjyldyqta óńirde 5 mln sharshy metrden astam turǵyn úı salý josparlanyp otyr.
Aldaǵy eki jylda óz kezegin jyldar boıy kútken otbasylarǵa páter beriledi dep kózdelýde. Bıyl 850 kópbalaly otbasy turǵyn úı alýy tıis.
Basqarma basshysynyń aqparaty boıynsha, 2020 jyly 1602 otbasy jalǵa beriletin baspanamen qamtylady. Halyqtyń áleýmettik qorǵalatyn jikteri úshin turǵyn úı qurylysyna respýblıkalyq bıýdjetten qarajat bólinedi.
«Osy jylǵa arnalǵan josparlar óte mańyzdy. Turǵyn úı qurylysyn qarjylandyrý 2,5 esege ulǵaıýda. Jalǵa beriletin jáne nesıelik turǵyn úı úsh ese kóp beriledi. Bul qarqyndy odan ári ustap turatyn bolamyz. Qoljetimdi turǵyn úı máselesi óte mańyzdy. Biz qalalar men aýdandardaǵy kezekte barynsha tezirek qysqartý úshin bar kúsh-jigerimizdi jumsaımyz», - dep atap ótti oblys ákimi Jeńis Qasymbek.
Óńir basshysy jobalyq-smetalyq qujattamany ýaqtyly daıyndaýdy, sondaı-aq jańa qurylys sapasyna baqylaýdy kúsheıtýdi tapsyrdy. Jeke turǵyn úı salý úshin barlyq jaǵdaı jasalýy jáne qajetti ınfraqurylym júrgizilýi tıis.
