Qaraǵandy oblysynda kolledjderde bilim alýǵa 8 115 grant bólindi
QARAǴANDY. QazAqparat – Qaraǵandy oblysynyń kolledjderine búgingi kúni 6 myńǵa jýyq ótinish berildi. Qabyldaý naýqanynyń barysy týraly bilim basqarmasynyń basshysy Gúlsim Qojahmetova óziniń Facebook paraqshasynda aıtyp berdi, dep habarlaıdy QazAqparat tilshisi.
«Qazirgi ýaqytta oblys kolledjderinde oqýǵa qujattar qabyldaý júrgizilýde. Jergilikti bıýdjetten 8 115 grant bólindi. Sondaı-aq, Nátıjeli jumyspen qamtý jáne jappaı kásipkerlikti damytý baǵdarlamasy aıasynda 700 oryn qarastyrylǵan», - dedi vedomstvo basshysy.
Oryn sany boıynsha birinshi orynda orta býyn jáne qoldanbaly bakalavrıat mamandaryn daıarlaý (47,3%). Jumys kadrlaryn daıarlaý da edáýir úlesti (46,3%) alady. Medıtsına mamandaryn oqytýǵa 515 oryn nemese 6,4% bólindi.
Basqarma basshysynyń aqparaty boıynsha, qazirgi ýaqytta kolledjderge 5 998 ótinish qabyldandy, onyń ishinde bıýdjettik negizge – 4 893.
«Bıyl qabyldaý erejelerine ózgerister engizildi. Sondaı-aq, tegin bilim alǵysy keletinder úshin kvotalar tizimi keńeıtildi. Endi kvotalar 9 sanat boıynsha qarastyrylǵan. Kóp balaly otbasylardan shyqqan balalar úshin 5%, osy mártebesi keminde úsh jyl rastalǵan tolyq emes otbasylardan shyqqan balalar úshin 1%, bala kezinen múgedek balalardy tárbıelep otyrǵan otbasylardan shyqqan balalar, birinshi jáne ekinshi toptaǵy múgedekter úshin 1% kvota qosyldy. Balldar teń bolǵan jaǵdaıda kvotalyq sanat jáne attestattyń ortasha bally eskeriledi», – dep atap ótti Gúlsim Qojahmetova.
Pedagogıkalyq, medıtsınalyq jáne shyǵarmashylyq mamandyqtardy qospaǵanda, oqýǵa túsý emtıhandary toqtatyldy. Konkýrs attestat boıynsha - mindetti jáne beıindi pánderdiń ortasha baly boıynsha ótkiziledi.
Bıyl oblysta MySollege platformasy quryldy, onda talapkerler kásiptik baǵdarlaý testinen óte alady.
Orta býyn jáne qoldanbaly bakalavrıat mamandary úshin qujattardy qabyldaý aqparattyq júıe arqyly júzege asyrylady.
Bolashaq stýdentter tórt kolledj ben tórt mamandyqty tańdaı alady.
Talapkerlerdi mamandyqtar men kolledjder boıynsha aqparattyq portal arqyly saralaý 19-25 tamyz aralyǵynda júrgiziledi.
Kolledjderge qabyldaý 31 tamyzda aıaqtalady.
